പാലാരിവട്ടത്തേത്​ ‘പഞ്ചവടി പാലം’ പോലെയാണോയെന്ന്​ ഹൈകോടതി

കൊച്ചി: പാലാരിവട്ടം മേല്‍പാലം ‘പഞ്ചവടി പാലം’ പോലെയാണോയെന്ന്​ ഹൈകോടതി. നിര്‍മാണവുമായി ബന്ധപ്പെട്ട അഴിമതി ക്കേസില്‍ കൂടുതല്‍ പേർ അറസ്​റ്റിലാകുമെന്ന് വിജിലന്‍സ്. മേല്‍പാലം അഴിമതിക്കേസിലെ മൂന്ന്​ പ്രതികളുടെ ജാമ്യഹര ജി പരിഗണിക്ക​െവയാണ്​ ഹൈകോടതിയുടെ വാക്കാൽ പരാമർശവും വിജിലൻസി​​​െൻറ വിശദീകരണവും.

ഒന്നാം പ്രതി സുമീത് ഗോയ ൽ, രണ്ടാം പ്രതിയും കേരള റോഡ്സ് ആൻഡ് ബ്രിഡ്‌ജസ് ഡെവലപ്​മ​​െൻറ്​ കോർപറേഷൻ (ആർ.ബി.ഡി.സി​.കെ) അസി. ജനറൽ മാനേജറുമായ എം.ടി. തങ്കച്ചൻ, നാലാം പ്രതിയും പൊതുമരാമത്ത് മുൻ സെക്രട്ടറിയുമായ ടി.ഒ. സൂരജ് എന്നിവരുടെ ജാമ്യഹരജികളാണ്​ കോടതിയുടെ പരിഗണനയിലുള്ളത്​. അന്വേഷണ പുരോഗതിയടക്കം വിശദാംശങ്ങൾ നൽകാൻ നിർദേശിച്ച കോടതി ഹരജി ഈ മാസം 24ന് പരിഗണിക്കാൻ മാറ്റി.

അന്വേഷണം ഏതു ഘട്ടത്തിലെത്തിയെന്ന്​ കോടതി ആരാഞ്ഞു. പുരോഗമിക്കുകയാണെന്നും കൂടുതല്‍ പ്രതികൾ അറസ്​റ്റിലാകുമെന്നും വിജിലന്‍സ് സ്‌പെഷല്‍ ഗവ. പ്ലീഡര്‍ കോടതിയെ അറിയിച്ചു. ഉത്തരവാദപ്പെട്ട ഉദ്യോഗസ്ഥനായിരുന്നതിനാൽ സര്‍ക്കാറെടുത്ത തീരുമാനങ്ങളില്‍ ഒപ്പുവെക്കുക മാത്രമാണ് ചെയ്തതെന്ന ടി.ഒ. സൂരജി​​​െൻറ വാദം പരിഗണിച്ച കോടതി എന്തിനാണ്​ പരസ്പരം കുറ്റപ്പെടുത്തുന്നതെന്ന് ചോദിച്ചു. ആരെയും കുറ്റപ്പെടുത്തുന്നതല്ലെന്നും നടപടിക്രമങ്ങൾ വിശദീകരിക്കുകയും സ്വന്തം നിലപാട് പറയുകയുമാണ്​ ചെയ്യുന്നതെന്നും സൂരജ് മറുപടി നല്‍കി.

അതേസമയം, കുറ്റകൃത്യത്തിൽ പ്രതികളുടെ പങ്ക് വ്യക്തമാണെന്നും ഇവരുടെ പ്രവര്‍ത്തനംമൂലം പാലം പൂര്‍ണമായും പൊളിക്കേണ്ട അവസ്ഥയിലാണെന്നും വിജിലന്‍സ് വിശദീകരിച്ചു. പൊതുസുരക്ഷ അപകടത്തിലാക്കുന്ന നടപടിയാണ് പ്രതികളുടെ ഭാഗത്തുനിന്ന്​ ഉണ്ടായതെന്നും ഭാവിയില്‍ ഇത്തരം പ്രവര്‍ത്തനങ്ങള്‍ ഉണ്ടാകാതിരിക്കാനുള്ള നടപടികളാണ് സ്വീകരിക്കുന്നതെന്നും സര്‍ക്കാറിനുവേണ്ടി ഹാജരായ സീനിയര്‍ ഗവ. പ്ലീഡര്‍ അറിയിച്ചു.

കേസുമായി ബന്ധപ്പെട്ട രേഖകളെല്ലാം വിജിലന്‍സ് കസ്​റ്റഡിയിലെടുത്തതിനാൽ ജയിലില്‍ തുടരേണ്ട കാര്യമില്ലെന്നായിരുന്നു പ്രതികളുടെ വാദം. താന്‍ അഴിമതി നടത്തിയിട്ടില്ലെന്നും നിര്‍മാണത്തിന് മേല്‍നോട്ടം വഹിച്ചവരെ പ്രതിയാക്കിയിട്ടില്ലെന്നും സൂരജ്​ വാദിച്ചു. എന്നാൽ, പാലത്തി​​​െൻറ നിലവിലെ സ്ഥിതി പരിശോധിച്ചാൽ നിർമാണ മേൽനോട്ടമേ ഉണ്ടായിട്ടില്ലെന്നാണ്​ മനസ്സിലാകുന്നതെന്ന്​ കോടതി ചൂണ്ടിക്കാട്ടി. കേസുമായി ബന്ധപ്പെട്ട രേഖകൾ ഹാജരാക്കാൻ നിർദേശിച്ചു.