വൈഗയുടെ മൃതദേഹം കണ്ടെടുക്കു​േമ്പാൾ പിതാവ്​ തിയറ്ററിൽ സിനിമ കാണുകയായിരുന്നു

കാക്കനാട്: മകൾ വൈഗയെ പുഴയിലെറിഞ്ഞ ശേഷം സനുമോഹന്‍റെ ഒളിവു ജീവിതം സംബന്ധിച്ച്​ ചോദ്യം ചെയ്യലിൽ കൂടുതൽ വിവരങ്ങൾ പുറത്തുവന്നു. വൈഗയെ കൊലപ്പെടുത്തിയശേഷം വാളയാർ അതിർത്തി വഴി തമിഴ്‌നാട്ടിലേക്ക് കടന്ന സനു മോഹൻ പിന്നീട് ബംഗളൂരുവിലേക്ക് തിരിച്ചു. അവിടത്തെ മൾട്ടിപ്ലക്സ് തിയറ്ററിൽ സനു​മോഹൻ മലയാളം ഹൊറർ സിനിമ കണ്ടിരിക്കു​േമ്പാഴാണ്​ മുട്ടാർ പുഴയിൽ നിന്ന്​ മകളുടെ മൃതദേഹം കണ്ടെടുക്കുന്നത്​. ഒളിവിൽ കഴിഞ്ഞ ആദ്യദിനങ്ങളിൽ എങ്ങനെ ജീവി​െച്ചന്ന ചോദ്യത്തിനായിരുന്നു മറുപടി. പോസ്​റ്റ്​മോർട്ടം നടപടിക്കുശേഷം വൈഗയുടെ മൃതദേഹം ഏറ്റുവാങ്ങി സംസ്കരിക്കുന്നതിനുള്ള തിരക്കിലായിരുന്നു പിന്നീട്​ നാട്ടിലെ ബന്ധുക്കൾ.

വൈഗ തനിക്ക് ജീവനായിരു​െന്നന്ന് പറയുമ്പോഴും കുട്ടിയെ കൊന്നശേഷമുള്ള ഇയാളുടെ ചെയ്തികൾ അന്വേഷണ സംഘത്തെപ്പോലും അദ്​ഭുതപ്പെടുത്തുന്നതാണ്. ബംഗളൂരുവിലെ ദിവസങ്ങളിൽ ബാറുകളിലും ചൂതാട്ട കേന്ദ്രങ്ങളിലുമായിരുന്നു ഇയാൾ സമയം ചെലവഴിച്ചത്​. ഇതൊന്നും തനിക്കൊരു പ്രശ്നമല്ലെന്ന രീതിയാണ്​ ഇയാളുടേതെന്നും ഉദ്യോഗസ്ഥർ കൂട്ടിച്ചേർത്തു. സനു മോഹനെക്കുറിച്ച് കൂടുതൽ വിവരങ്ങൾ പുറത്തുവരുമ്പോൾ സംഭവത്തിൽ ദുരൂഹത ഏറുകയാണ്. ഇയാളെ ബുദ്ധിമാനായ സൈകോ എന്നാണ് ഉദ്യോഗസ്ഥർ വിശേഷിപ്പിച്ചത്.

അതേസമയം അന്വേഷണ സംഘത്തിലെ മുഴുവൻപേർക്കും മികച്ച സേവനത്തിന് പ്രത്യേക പുരസ്കാരം നൽകാൻ പൊലീസ് വകുപ്പ് തീരുമാനിച്ചിട്ടുണ്ട്​. ഡി.ജി.പി ലോക്നാഥ് ബെഹ്റയാണ് ഇക്കാര്യം അറിയിച്ചത്. ഉദ്യോഗസ്ഥർക്ക് മികച്ച സേവനത്തിനുള്ള ഗുഡ് സർവിസ് എൻട്രി നൽകുമെന്ന് സിറ്റി പൊലീസ് കമീഷണർ എച്ച്. നാഗരാജുവും പറഞ്ഞിരുന്നു.