​കാലവർഷം: െട്രയിനുകൾ മണിക്കൂറുകള്‍ വൈകി; യാത്രക്കാര്‍ വലഞ്ഞു

തിരുവനന്തപുരം: ശക്തമായ മഴയിൽ റെയിൽവേ സ്​റ്റേഷനിൽ വെള്ളം കയറിയും ട്രാക്കിൽ ഗർത്തം രൂപപ്പെട്ടും ലൈനിൽ മരം വീണും സംസ്​ഥാനത്തി​​െൻറ വിവിധ ഭാഗങ്ങളിൽ ട്രെയിൻ സർവിസ്​ താളംതെറ്റി. എറണാകുളം സ്​റ്റേഷനില്‍ വെള്ളം കയറിയതാണ്​ തലസ്​ഥാനത്തേക്കുള്ള ​െട്രയിൻഗതാഗതത്തിന്​ തടസ്സം സൃഷ്​ടിച്ചത്​. കൊല്ലത്ത്​ എൻജിന്‍ തകരാറും അനന്തപുരി എക്​സ്​പ്രസി​​െൻറ എൻജിന്​ തീപിടിച്ചതും കൂടിയായപ്പോൾ അഞ്ച്​ മണിക്കൂര്‍വരെ ​െട്രയിനുകൾ വൈകി. ഇതോടെ യാത്രക്കാര്‍ വലഞ്ഞു. 

പാലക്കാട്​ ലെക്കിടിക്കും മങ്കരക്കും ഇടയിലെ പൂക്കാട്ടുകുന്ന് റെയിൽവേ ട്രാക്കിന് നടുവിൽ കുഴി രൂപപ്പെട്ടതിനെ തുടർന്ന്​ ട്രെയിനുകൾ വൈകി. നാട്ടുകാരുടെ ഇടപെടലിനെ തുടർന്നാണ്​ വൻ ദുരന്തം ഒഴിവായത്​. തിങ്കളാഴ്ച രാവിലെ 7.30ഒാടെ പ്രദേശവാസി സുരേന്ദ്രനാണ് മൂന്നടി ആഴമുള്ള കുഴി കണ്ടത്. ഇദ്ദേഹം കീമാൻ മുഹമ്മദലിയെ വിവരം അറിയിച്ചു. തുടർന്ന്​ റെയിൽവേ എൻജിനീയർ ധന്യയുടെ നേതൃത്വത്തിൽ തൊഴിലാളികളെത്തി കുഴി മെറ്റലിട്ട് നികത്തി. മഴയിൽ പാളത്തിനടിയിലെ മെറ്റൽ ഒലിച്ചു പോയതാണ് കുഴിക്ക്​ കാരണമെന്ന് അധികൃതർ അറിയിച്ചു. 11.30ഒാടെയാണ് ട്രെയിൻ ഗതാഗതം പൂർവസ്​ഥിതിയിലായത്.

അരൂരിൽ തീരദേശ റെയിൽപാതയിൽ ട്രെയിനി​​െൻറ മുകളിലേക്ക്​ വൈദ്യുതി കമ്പികളും മരവും വീണു.  ട്രെയിനുകൾ മൂന്നര മണിക്കൂർ ഓടിയില്ല. തിങ്കളാഴ്ച പുലർച്ച ചന്തിരൂർ വെളുത്തുള്ളി ഭാഗത്തായിരുന്നു സംഭവം. മംഗലാപുരം-കൊച്ചുവേളി അന്ത്യോദയ എക്സ്പ്രസി​​െൻറ പിൻഭാഗത്തെ ബോഗികളിലൊന്നി​​െൻറ മുകളിലേക്ക് വൈദ്യുതി കമ്പികൾക്കൊപ്പം മരം വീണെങ്കിലും ബോഗികളിൽ വൈദ്യുതി കമ്പികൾ തൊടാതിരുന്നതുമൂലം വൻ ദുരന്തം ഒഴിവായി. കൊച്ചുവേളിയിലേക്ക് പോകുകയായിരുന്നു ട്രെയിൻ.

അപകടത്തെ തുടർന്ന് രാവിലെ എത്തിയ മറ്റ്​ ട്രെയിനുകൾ കുമ്പളം, തുറവൂർ, ചേർത്തല എന്നീ സ്​റ്റേഷനുകളിൽ പിടിച്ചിട്ടു. എറണാകുളം, ആലപ്പുഴ ഭാഗങ്ങളിലേക്കുള്ള പാസഞ്ചർ ട്രെയിനുകളിലെ യാത്രക്കാരും വലഞ്ഞു. ചേർത്തലക്കും അരൂരിനുമിടയിൽ വിവിധ ട്രെയിനുകളിൽ കുടുങ്ങിയ യാത്രക്കാർ നരകയാതന അനുഭവിച്ചു. പലർക്കും ജോലിക്ക്​ കയറാൻ കഴിഞ്ഞില്ല. കൊച്ചുവേളി എക്സ്പ്രസിലെ യാത്രക്കാർക്ക് ട്രെയിനിൽനിന്ന്​ പുറത്തിറങ്ങാൻപോലും കഴിഞ്ഞില്ല.