മൂന്ന് ജില്ലകളിൽ ഇന്ന് അതിതീവ്ര മഴക്ക് സാധ്യത

തിരുവനന്തപുരം: സംസ്ഥാനത്ത് അതിശക്തമായ മഴ പ്രവചിച്ച സാഹചര്യത്തിൽ ഒമ്പതംഗ ദേശീയ ദുരന്തനിവാരണ സേനയെ (എൻ.ഡി.ആർ.എഫ്) വിവിധ ജില്ലകളിൽ നിയോഗിച്ചു. വെള്ളിയാഴ്ച മലപ്പുറം, കോഴിക്കോട്, കണ്ണൂർ ജില്ലകളിൽ 24 മണിക്കൂറിനിടെ 115.6 മുതൽ 204.4 മില്ലി മീറ്റർ വരെ മഴ ലഭിക്കുമെന്നാണ് പ്രവചനം.

മലപ്പുറം, കോഴിക്കോട്, കണ്ണൂർ, വയനാട്, കാസർകോട്, പാലക്കാട് ജില്ലകളിലാണ് അടുത്ത 72 മണിക്കൂർ അതിതീവ്രമഴ പ്രതീക്ഷിക്കുന്നത്. ആലപ്പുഴ, എറണാകുളം, ഇടുക്കി, തൃശൂർ, പാലക്കാട്, വയനാട്, കാസർകോട് ജില്ലകൾ യെല്ലോ അലർട്ടിലാണ്. സംസ്ഥാന സർക്കാറിന്‍റെ അഭ്യർഥനയെ തുടർന്നാണ് ഇടുക്കി, പത്തനംതിട്ട, ആലപ്പുഴ, എറണാകുളം, മലപ്പുറം, കൊല്ലം, കോഴിക്കോട്, തൃശൂർ, വയനാട് ജില്ലകളിലായി സേനയെ വിന്യസിച്ചത്.

കേരള-തമിഴ്‌നാട് തീരങ്ങളിൽ കള്ളക്കടൽ പ്രതിഭാസത്തിനും ഉയർന്ന തിരമാലക്കും സാധ്യതയുണ്ടെന്ന് ദേശീയ സമുദ്രസ്ഥിതി പഠന ഗവേഷണ കേന്ദ്രം അറിയിച്ചു. മത്സ്യത്തൊഴിലാളികളും തീരവാസികളും പ്രത്യേക ജാഗ്രത പാലിക്കണം. ജൂൺ 24 വരെ കേരള-കർണാടക-ലക്ഷദ്വീപ്‌ തീരങ്ങളിൽ മത്സ്യബന്ധനത്തിന് പോകാൻ പാടില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.