ദുരന്തം നേരിടുന്നതിൽ കേരളം മാതൃകയായി പ്രവർത്തിച്ചു -മുഖ്യമന്ത്രി

തിരുവനന്തപുരം: ദുരന്തം നേരിടുന്നതിൽ ഒത്തൊരുമയോടെ പ്രവർത്തിച്ച്​ കേരളം മാതൃകയായെന്ന്​ മുഖ്യമന്ത്രി പിണറായി വിജയൻ. ഇതിലൂടെ ദുരന്തം അതിജീവിക്കാൻ​ സാധിച്ചു. ദുരിതാശ്വാസ ക്യാമ്പുകളെല്ലാം മികച്ച രീതിയിലാണ്​ പ്രവർത്തിക്കുന്നതെന്നും അദ്ദേഹം പറഞ്ഞു. ക്യാമ്പിലുള്ള ഒാരോ കുടുംബത്തിനും​​ 3,800 രൂപ വീതം അടിയന്തര ധനസഹായം അനുവദിക്കുമെന്ന്​ അദ്ദേഹം പറഞ്ഞിരുന്നു. 

കാലവർഷക്കെടുതി വിലയിരുത്തുന്നതി​​​െൻറ ഭാഗമായാണ്​ മുഖ്യമന്ത്രി, റവന്യൂമന്ത്രി ഇ. ചന്ദ്രശേഖരൻ, പ്രതിപക്ഷ നേതാവ് രമേശ് ചെന്നിത്തല, ചീഫ് സെക്രട്ടറി, അഡീഷനൽ ചീഫ് സെക്രട്ടറി എന്നിവരടങ്ങിയ സംഘം ദുരിതാശ്വാസ ക്യാമ്പുകൾ സന്ദർശിച്ചത്.

ഭൂമി നഷ്​ടപ്പെട്ടവർക്ക്​ ആറ്​ ലക്ഷം രൂപയും വീട്​ നഷ്​ടപ്പെട്ടവർക്ക്​ നാല്​ ലക്ഷം രൂപയും നൽകും. പുസ്​തകം നഷ്​ടപ്പെട്ട കുട്ടികൾക്ക്​​ പുതിയത്​ സ്​കൂളിൽ നിന്ന്​ വിതരണം ചെയ്യും. രേഖകൾ നഷ്ടപ്പെട്ടവർക്കും  ആശങ്ക വേണ്ടെന്ന്​ മുഖ്യമന്ത്രി അറിയിച്ചു. കൃഷി നഷ്ടം നേരിട്ടവർക്ക്​ ഉയർന്ന തുക നൽകും. ശുചീകരണ പ്രവർത്തനം പ്രധാനമാണെന്നും മുഖ്യമന്ത്രി അറിയിച്ചു.

എല്ലാ അർത്ഥത്തിലുമുള്ള കരുതൽ നടപടികളും സ്വീകരിക്കും. ഒരു ഭിന്നതയും അക്കാര്യത്തിൽ ഉണ്ടായില്ല എന്നതിനാലാണ്​ ദുരന്തം അതിജീവിക്കാനായത്​. കേന്ദ്രമടക്കം ഇക്കാര്യത്തിൽ മികച്ച ഇടപെടൽ നടത്തിയെന്നും അദ്ദേഹം വ്യക്​തമാക്കി. ക്യാമ്പുകളിൽ യാതൊരു വിധത്തിലുമുള്ള അസംതൃപ്തി നിലവിലില്ല. നഷ്ടപരിഹാരം നൽകുന്നതിനുള്ള മാനദണ്ഡം മാറ്റിയതോടെ, മാറ്റി പാർപ്പിച്ചവർക്ക് സഹായം നൽകാനായെന്നും മുഖ്യമന്ത്രി കൂട്ടിച്ചേർത്തു.

ദുരന്തമേഖലകള്‍ സന്ദര്‍ശിക്കുന്നതി​​​െൻറ ഭാഗമായി മുഖ്യമന്ത്രിയുടെ നേതൃത്വത്തിലുള്ള സംഘം കൊച്ചിയിലെത്തി. ചെമ്മങ്ങനാട് സ്‌കൂളിലെ ദുരിതാശ്വാസ ക്യാമ്പ് മുഖ്യമന്ത്രി സന്ദര്‍ശിച്ചു. മഴക്കെടുതി വിലയിരുത്താനും ദുരിതാശ്വാസ പ്രവര്‍ത്തനങ്ങള്‍ ഊര്‍ജ്ജിതമാക്കാനാവശ്യമായ നടപടികള്‍ സ്വീകരിക്കാനും മുഖ്യമന്ത്രിയുടെ നേതൃത്വത്തില്‍ ആലുവയില്‍ അവലോകന യോഗം ചേര്‍ന്നു.