തൊടുപുഴക്കടുത്ത് ഉരുൾപൊട്ടൽ;​ കുട്ടിയടക്കം കുടുംബത്തിലെ അഞ്ചുപേർ മരിച്ചു

തൊടുപുഴ: കുടയത്തൂരിൽ കനത്ത മഴയെത്തുടർന്നുള്ള ഉരുൾപൊട്ടലിൽ വീട്​ തകർന്ന്​ കുട്ടിയടക്കം ഉറങ്ങിക്കിടന്ന ഒരു കുടുംബത്തിലെ അഞ്ചുപേർ മരിച്ചു. സംഗമം കവലക്ക്​ സമീപം പന്തപ്ലാവ് ചിറ്റടിച്ചാലിൽ തങ്കമ്മ (70), മകൻ സോമൻ (53), ഭാര്യ ഷിജി (50), മകൾ ഷിമ (25), ഷിമയുടെ മകൻ ദേവാക്ഷിദ് (അഞ്ച്) എന്നിവരാണ് മരിച്ചത്. തിങ്കളാഴ്ച പുലർച്ച മൂന്ന് മണിയോടെയാണ്​ നാടിനെ നടുക്കിയ ദുരന്തം.

കുടയത്തൂർ സംഗമം കവലയിൽനിന്ന് രണ്ടര കിലോമീറ്റർ മുകളിൽ മോർക്കാട്-പന്തപ്ലാവ് റോഡിന് താഴ്ഭാഗത്തുനിന്നാണ് ഉരുൾപൊട്ടി കൂറ്റൻ പാറക്കല്ലും ചളിമണ്ണും വന്മരങ്ങളും സോമന്‍റെയും കുടുംബത്തിന്‍റെയും വീടിന്​ മുകളിൽ പതിച്ചത്​​. വലിയ ശബ്ദംകേട്ട് പ്രദേശവാസികൾ പുറത്തിറങ്ങി നോക്കുമ്പോൾ സോമന്‍റെ വീടിന്‍റെ സ്ഥാനത്ത് വലിയ പാറക്കല്ലുകളും ചളിമണ്ണുമായിരുന്നു. അയൽവാസികൾ പൊലീസിലും അഗ്നിരക്ഷാസേനയിലും വിവരമറിയിച്ചു.

പൊലീസും മൂലമറ്റത്തുനിന്ന്​ അഗ്നിരക്ഷസേനയും നടത്തിയ തിരച്ചിലിൽ അഞ്ച് മണിയോടെ തങ്കമ്മയുടെ മൃതദേഹം ലഭിച്ചു. ഇതിനിടെ, സമീപത്തെ എട്ട് സ്റ്റേഷനുകളിൽനിന്ന്​ അഗ്നിരക്ഷസേന സംഘം സ്ഥലത്തെത്തി. ഏഴരയോടെ വീടിരുന്ന സ്ഥലത്തിന്​ 10 മീറ്റർ താഴെനിന്ന് അഞ്ചുവയസ്സുകാരൻ ദേവാക്ഷിതിന്‍റെയും എട്ടരയോടെ സമീപത്തുനിന്ന് തന്നെ ഷിമയുടെ മൃതദേഹവും ലഭിച്ചു. 11 മണിയോടെയാണ്​ സോമന്‍റെയും ഭാര്യ ഷിജിയുടെയും മൃതദേഹം കണ്ടെത്തിയത്​.

മൃതദേഹങ്ങൾ തൊടുപുഴ ജില്ല ആശുപത്രിയിൽ പോസ്റ്റ്‌മോർട്ടത്തിന്​ ശേഷം വൈകീട്ട് കുടയത്തൂർ പ്രാഥമിക ആരോഗ്യകേന്ദ്രത്തിൽ പൊതുദർശനത്തിന് വെച്ചു. തുടർന്ന്​, തൊടുപുഴ ശാന്തിതീരം പൊതുശ്മശാനത്തിൽ സംസ്‌കരിച്ചു.

മന്ത്രിമാരായ കെ. രാജൻ, റോഷി അഗസ്റ്റിൻ, ഡീൻ കുര്യാക്കോസ് എം.പി എന്നിവർ സംഭവസ്ഥലം സന്ദർശിച്ചു. റബർ ടാപ്പിങ്​ തൊഴിലാളിയായിരുന്നു സോമൻ. ഭാര്യ എടാട് ഗവ. എൽ.പി സ്കൂളിൽ പാർട്ട്ടൈം സ്വീപ്പറും ഷിമ കാഞ്ഞാറിലെ സ്വകാര്യ ലാബിലെ ടെക്നീഷ്യയുമാണ്. ദേവാക്ഷിദ് ഒന്നാംക്ലാസ് വിദ്യാർഥിയാണ്.