ചൂട് ഉയരുന്നു; വൈദ്യുതി ഉപയോഗം സർവകാല റെക്കോഡിൽ

തിരുവനന്തപുരം: ഉയരുന്ന ചൂടിനൊപ്പം കുതിച്ചുയർന്ന്​ വൈദ്യുതി ഉപയോഗവും. 103.86 ദശലക്ഷം യൂനിറ്റാണ്​ ചൊവ്വാഴ്​ച സംസ്ഥാനത്ത്​ ഉപയോഗിച്ചത്​. പീക്ക്​ സമയത്തെ ആവശ്യകത 5301 മെഗാവാട്ടായിരുന്നു. ഇതു സർവകാല റെക്കോഡാണ്​.

ഒരാഴ്ചയിലേറെയായി മിക്ക ദിവസങ്ങളിലും വൈദ്യുതി ഉപയോഗം 100 ദശലക്ഷം യൂനിറ്റിന്​ മുകളിലാണ്​. ​ഉപഭോഗം കൂടുമ്പോൾ അമിത വിലയ്​ക്ക്​ വൈദ്യുതി പവർ എക്സ്ചേഞ്ചിൽനിന്ന്​ വാങ്ങിയാണ്​ വിതരണം. 300 മുതൽ 600​ മെഗാവാട്ട്​ വരെ വൈദ്യുതി മിക്കദിവസങ്ങളിലും ഉയർന്ന വിലയ്​ക്ക്​ വാങ്ങിയാണ്​ പ്രതിസന്ധി ഒഴിവാക്കുന്നത്​.