ആരോഗ്യം ഇനി വീണയുടെ കൈയിൽ; വെല്ലുവിളികളേറെ

തിരുവനന്തപുരം: കേരളത്തിന്‍റെ ആരോഗ്യരംഗം സമാനതകളില്ലാത്ത പ്രതിസന്ധി നേരിടു​േമ്പാഴാണ്​ വീണാ ജോർജ്​ ആരോഗ്യമന്ത്രിയായി എത്തുന്നത്​. ഔദ്യോഗിക പ്രഖ്യാപനം വന്നിട്ടില്ലെങ്കിലും വീണ തന്നെ ആരോഗ്യമന്ത്രിയാകുമെന്ന്​ ഏതാണ്ട്​ ഉറപ്പായിട്ടുണ്ട്​. മുമ്പ്​ കെ.കെ ശൈലജ ടീച്ചർ കൈവശം വെച്ചിരുന്ന വകുപ്പിന്‍റെ തലപ്പത്തേക്ക്​ വീണയെത്തു​േമ്പാൾ ആറന്മുളയിൽ നിന്നുള്ള ഈ എം.എൽ.എക്ക്​ മുന്നിൽ വെല്ലുവിളികൾ ഏറെയാണ്​.

കോവിഡ്​ പ്രതിസന്ധിയാണ്​ ആരോഗ്യമന്ത്രിക്ക്​ മുന്നിലെ പ്രധാന വെല്ലുവിളി. കോവിഡ്​ രണ്ടാം തരംഗം സംസ്ഥാനത്ത്​ അതിരൂക്ഷമായി തുടരുകയാണ്​. ഇതിനെതിരായ പ്രതിരോധ പ്രവർത്തനങ്ങളുടെ ചുക്കാൻ പിടിക്കാൻ ഇനി മുഖ്യമന്ത്രി പിണറായി വിജയനൊപ്പം ആരോഗ്യമന്ത്രിയെന്ന നിലയിൽ വീണാ ജോർജിനും നിർണായക സ്ഥാനമുണ്ടാകും. മുമ്പ്​ ശൈലജ ടീച്ചർ ഭംഗിയായി നിർവഹിച്ച ചുമതല അതിനേക്കാളും നന്നായി ചെയ്യുകയെന്ന വെല്ലുവിളി കൂടി വീണക്ക്​ ഏറ്റെടുക്കേണ്ടി വരും.

എം.എൽ.എയെന്ന നിലയിൽ നടത്തിയ മികച്ച പ്രവർത്തനമാണ്​ വീണക്ക്​ ആരോഗ്യമന്ത്രി സ്ഥാനം ലഭിക്കാൻ കാരണമെന്ന റിപ്പോർട്ടുകൾ പുറത്ത്​ വരുന്നുണ്ട്​. ശൈലജ ടീച്ചറുടെ പിൻഗാമിയായി മറ്റൊരു വനിതയെ സ്ഥാനത്തെത്തിക്കണമെന്ന നിർബന്ധവും സി.പി.എമ്മിനുണ്ടായിരുന്നുവെന്ന്​ വേണം കരുതാൻ. പാർട്ടി ഏൽപ്പിക്കുന്ന ഉത്തരവാദിത്വം ഏറ്റവും ഭംഗിയായി നിർവഹിക്കാൻ ശ്രമിക്കുമെന്നാണ്​ മന്ത്രിസ്ഥാനത്തെ കുറിച്ചുള്ള അവരുടെ ആദ്യ പ്രതികരണം. വകുപ്പ്​ സംബന്ധിച്ച്​ ഔദ്യോഗികമായി അറിയിപ്പുകളൊന്നും വന്നിട്ടില്ലെന്നും വീണാ​ ജോർജ്​ പറഞ്ഞു.