വീണ ജോർജ് രാജിവെക്കണമെന്ന ആവശ്യം തള്ളി സി.പി.എം

തിരുവനന്തപുരം: കോട്ടയം മെഡിക്കൽ കോളജിലെ അപകടവുമായി ബന്ധപ്പെട്ട്​ കെട്ടിച്ചമച്ച പ്രചാരവേലയാണ്​ മന്ത്രിമാർക്കെതിരെ നടക്കുന്ന​തെന്നും ആരോഗ്യമന്ത്രി വീണ ​ജോർജ്​ രാജിവെക്കില്ലെന്നും സി.പി.എം. സ്വകാര്യ മേഖലക്കായി പൊതുജനാരോഗ്യ സംവിധാനങ്ങളെയാകെ ഇകഴ്ത്തിക്കാട്ടി ജനങ്ങൾക്കിടയിൽ തെറ്റായ ബോധം സൃഷ്​ടിക്കാനാണ്​ പ്രതിപക്ഷ പാർട്ടികൾ ശ്രമിക്കുന്ന​ത്​. കെട്ടിടം തകർന്ന്​ സ്​ത്രീ മരിച്ചത് ദൗർഭാഗ്യകരമാണ്​. മരിച്ചവരുടെ കുടുംബത്തിന്​ സഹായം നൽകി സർക്കാർ ആശ്വാസ നടപടിയിലേക്ക്​ പോകണ​മെന്നും സംസ്ഥാന സെക്രട്ടേറിയറ്റ്​ യോഗശേഷം നടത്തിയ വാർത്ത സമ്മേളത്തിൽ സെക്രട്ടറി എം.വി. ഗോവിന്ദൻ വ്യക്തമാക്കി.

എക്സ്ക​വേറ്റർ അപകടസ്ഥലത്തേക്ക്​ എത്തിക്കുന്ന വഴിയിലെ തടസ്സങ്ങൾ ഒഴിവാക്കാനുള്ള വൈകലല്ലാതെ രക്ഷാപ്രവർത്തനത്തിൽ കാലതാമസമുണ്ടായിട്ടില്ല. സൂപ്രണ്ട്​ അറിയിച്ച വിവരമാണ്​ മന്ത്രിമാർ ആദ്യം മാധ്യമങ്ങളോട്​ പങ്കു​വെച്ചത്​. അപ്പോൾ പോലും രക്ഷാപ്രവർത്തനം നിർത്തിവെച്ചിരുന്നില്ല. മരിച്ച സ്ത്രീയുടെ ഭർത്താവ്​ പോലും സർക്കാറിനെതിരെ വിമർശനമുന്നയിച്ചിട്ടില്ല. അങ്ങോട്ടേക്ക്​ രക്ഷാപ്രവർത്തനത്തിന്​ എത്താനുള്ള തടസ്സം മാത്രമാണ്​ അവർ ചൂണ്ടിക്കാട്ടിയത്​. ഇക്കാര്യത്തിൽ പ്രതിപക്ഷ നേതാവിന്‍റെ പ്രസ്താവന സംഭവം വക്രീകരിച്ച്​ രാഷ്ട്രീയ നേട്ടമുണ്ടാക്കാനുള്ളതാണ്​. എന്ത് പ്രശ്നം വന്നാലും പ്രതിപക്ഷം മന്ത്രിമാരുടെ രാജിയാണ്​ ആദ്യം ആവശ്യപ്പെടുക. അപകടത്തിൽ എനിക്കും നിങ്ങൾക്കുമുള്ള ധാർമിക ഉത്തരവാദിത്തം മാത്രമേ ആരോഗ്യമന്ത്രിക്കുമുള്ളൂവെന്നും രാജിവെക്കേണ്ട സാഹചര്യമില്ലെന്നും അദ്ദേഹം പറഞ്ഞു.

ആരോഗ്യമേഖലയിൽ അടിക്കടിയുള്ള പ്രശ്നങ്ങളുടെ കാരണം സിസ്റ്റത്തിന്‍റെ തകരാറാണെന്ന ആരോഗ്യമന്ത്രിയുടെ വാദം ചൂണ്ടിക്കാട്ടിയപ്പോൾ, സിസ്റ്റത്തിന്‍റെ തകരാർ പറയാൻ ക്ലാസെടുക്കേണ്ടിവരുമെന്നും അത്​ പിന്നീടാകാമെന്നുമായിരുന്നു മറുപടി. കേരള സർവകലാശാല വി.സി രജിസ്​ട്രാറെ സസ്​പെൻഡ്​ ചെയ്തത്​ നീതിക്കെതിരായ കടന്നാക്രമണമാ​ണെന്നും ഗവർണർമാരായ രാ​ജേന്ദ്ര ആർലേക്കറിനെയും ആരിഫ്​ മുഹമ്മദ്​ ഖാനേയും താരതമ്യം ചെയ്യേണ്ടെന്നും ​​അദ്ദേഹം ചോദ്യത്തിന്​ മറുപടിയായി പറഞ്ഞു.