ഭർത്താവിനെതിരെ കേസുള്ളതിനാൽ ലോട്ടറി സമ്മാനം നൽകാനാകില്ലെന്ന്​ സർക്കാർ; രണ്ടു മാസത്തിനകം തുക കൈമാറണമെന്ന്​ കോടതി

കൊച്ചി: ലോട്ടറി ഏജൻറായ ഭർത്താവിനെതിരെ നിലനിൽക്കുന്ന നടപടിയുടെ പേരിൽ ഭാര്യക്ക്​ ലഭിച്ച ലോട്ടറി സമ്മാനത്തുക തടഞ്ഞുവെക്കാനാവില്ലെന്ന് ഹൈകോടതി. ഒറ്റ നമ്പർ ലോട്ടറി ചൂതാട്ടത്തി​െൻറ പേരിൽ നടപടി നേരിട്ട കണ്ണൂരിലെ മഞ്ജു ലോട്ടറി ഏജൻസി ഉടമ മുരളീധര​െൻറ ഭാര്യ പി. ഷിതക്ക് ലഭിച്ച ലോട്ടറി ടിക്കറ്റി​െൻറ ഒന്നാം സമ്മാനമായ 65 ലക്ഷം രൂപ തടഞ്ഞതിനെതിരെയാണ് ജസ്​റ്റിസ് പി.വി. കുഞ്ഞികൃഷ്‌ണ​െൻറ ഉത്തരവ്.

2015ൽ ഷിത എടുത്ത ലോട്ടറി ടിക്കറ്റിന് 65 ലക്ഷം രൂപ അടിച്ചിരുന്നു. എന്നാൽ, ഒറ്റ നമ്പർ ലോട്ടറി ചൂതാട്ടത്തി​െൻറ പേരിൽ ഭർത്താവ് മുരളീധര​െൻറ ഏജൻസി സസ്പെൻഡ് ചെയ്യുകയും കേസ് എടുക്കുകയും ചെയ്തതിനാൽ പണം നൽകാനാവില്ലെന്ന് വ്യക്തമാക്കി സർക്കാർ സമ്മാനത്തുക തടഞ്ഞുവെച്ചു. ഇതിനെതിരെ ഹരജിക്കാരി കോടതിയെ സമീപിക്കുകയായിരുന്നു.

സമ്മാനത്തുകക്ക്​ അർഹമായ ലോട്ടറി ടിക്കറ്റ് നടപടിക്രമങ്ങൾ പാലിച്ചാണ് ഹരജിക്കാരി സമർപ്പിച്ചതെന്നും ഹരജിക്കാരിക്കെതിരെ കേസ് നടപടികളൊന്നും നിലവിലില്ലെന്നും കോടതി വിലയിരുത്തി. അതിനാൽ ഹരജിക്കാരിക്ക് സമ്മാനത്തുകക്ക്​ അർഹതയുണ്ട്. തുക തടഞ്ഞുവെച്ച സർക്കാർ ഉത്തരവ് കോടതി റദ്ദാക്കി. ഇവർക്ക് രണ്ടു മാസത്തിനകം തുക കൈമാറാനും കോടതി നിർദേശിച്ചു.