വിവാദ അഭിമുഖം: ക്രൈംബ്രാഞ്ച്​ സെൻകുമാറിന്‍റെ മൊഴിയെടുത്തു

തിരുവനന്തപുരം: മതസ്പർധ വളർത്തുന്ന പരാമർശങ്ങൾ നടത്തിയെന്ന കേസിൽ ക്രൈംബ്രാഞ്ച്​ മുൻ ഡി.ജി.പി ടി.പി. സെൻകുമാറി​​െൻറ മൊഴിയെടുത്തു.  ഞായറാഴ്ച ക്രൈംബ്രാഞ്ച് എസ്.പി മുഹമ്മദ് ഷബീറി‍​െൻറ നേതൃത്വത്തിലാണ് സെൻകുമാറി‍​െൻറ വീട്ടിലെത്തി മൊഴിയെടുത്തത്​. വാരികക്ക് നൽകിയ അഭിമുഖത്തിൽ മതസ്പർധ വളർത്തുന്ന യാതൊന്നും താൻ പറഞ്ഞിട്ടില്ലെന്നും സ്ഥിതിവിവരക്കണക്കുകൾ മാത്രമാണ് പറഞ്ഞതെന്നും സെൻകുമാർ അറിയിച്ചു. ഇതുസംബന്ധിച്ച റിപ്പോർട്ടുകളുടെ കോപ്പി അദ്ദേഹം ക്രൈംബ്രാഞ്ചിന് കൈമാറി. 

റിപ്പോർട്ടർക്ക് അഭിമുഖം റെക്കോഡ് ചെയ്യാനുള്ള അനുമതി നൽകിയിരുന്നില്ല. ത​​െൻറ സംഭാഷണങ്ങളിൽ പലതും വളച്ചൊടിക്കുകയായിരുന്നു. രാജ്യാന്തര ഭീകര സംഘടനയെക്കുറിച്ച് പറഞ്ഞ അഭിപ്രായം വ്യക്തിപരമായിരുന്നെന്നും ഇതിൽ ഡി.ജി.പി നടപടിയെടുക്കുമെന്ന് പ്രതീക്ഷിക്കുന്നതായി ലേഖകനോട് പറഞ്ഞിരുന്നെന്നും സെൻകുമാർ പറഞ്ഞു. മൊഴിയെടുക്കൽ ഒരു മണിക്കൂറോളം നീണ്ടു. സെൻകുമാറി‍​െൻറ അഭിമുഖം പ്രസിദ്ധീകരിച്ച വാരികയുടെ എഡിറ്റർ സജി ജയിംസ്, റിപ്പോർട്ടർ റംഷാദ് എന്നിവരുടെ മൊഴി രേഖ​പ്പെടുത്തുകയും അഭിമുഖം റെക്കോഡ് ചെയ്ത മൊൈബൽഫോൺ ഫോറൻസിക് പരിശോധനക്ക് അയക്കുകയും ചെയ്തിരുന്നു.

വിവാദ അഭിമുഖവുമായി ബന്ധപ്പെട്ട് പരാതിക്കാരായ  മുസ്​ലിം യൂത്ത് ലീഗ് ജനറൽ സെക്രട്ടറി പി.കെ. ഫിറോസ് , കേരള കോൺഗ്രസ് സ്കറിയ തോമസ് കർഷക യൂനിയൻ സംസ്ഥാന പ്രസിഡൻറ് എ.എച്ച്. ഹഫീസ് തുടങ്ങിയവരുടെ മൊഴിയും എടുത്തിരുന്നു.