വിദ്വേഷ പരാമർശം: പി.സി. ജോർജിന്‍റെ ജാമ്യാപേക്ഷ മൂന്നാം തവണയും മാറ്റി

കോട്ടയം: മുസ്‌ലിം വിരുദ്ധ പരാമർശം നടത്തിയ കേസിൽ ബി.ജെ.പി നേതാവ്​ പി.സി. ജോർജിന്‍റെ മുൻകൂർ ജാമ്യാപേക്ഷ പരിഗണിക്കുന്നത്​ അഡീഷണൽ സെഷൻസ് കോടതി മാറ്റിവെച്ചു. ഇത് മൂന്നാം തവണയാണ്​ കേസ്​ മാറ്റിവെക്കുന്നത്​. 30ലേക്കാണ് മാറ്റിയിരിക്കുന്നത്.

ജനുവരി ആറിന് ചാനൽ ചർച്ചക്കിടെയാണ്​ പി.സി. ജോർജ്​ മുസ്‌ലിം വിരുദ്ധ പരാമർശം നടത്തിയത്​. ഇന്ത്യയിലെ മുസ്‌ലിംകള്‍ മുഴുവന്‍ മതവര്‍ഗീയവാദികളാണെന്നും ആയിരക്കണക്കിന് ഹിന്ദുക്കളെയും ക്രിസ്ത്യാനിനെയും കൊന്നുവെന്നുമായിരുന്നു വിവാദ പരാമര്‍ശം. മുസ്‌ലിംകള്‍ പാകിസ്താനിലേക്കു പോകണമെന്നും ജോര്‍ജ് ചര്‍ച്ചയില്‍ പറഞ്ഞു.

വിവിധ പരാതികളിൽ ഈരാറ്റുപേട്ട പൊലീസ്​ ജാമ്യമില്ല വകുപ്പ്​ പ്രകാരം​ കേസെടുത്തിരുന്നു​. മതസ്പര്‍ധ വളര്‍ത്തല്‍, കലാപാഹ്വാനം തുടങ്ങിയ വകുപ്പുകള്‍ ചുമത്തിയാണു നടപടി.