ഷഹാനക്കും ഹാരിസണിനും സ്വന്തം ഇഷ്​ടപ്രകാരം ജീവിക്കാമെന്ന് കോടതി

കണ്ണൂർ: ആറ്റിങ്ങൽ സ്വദേശിയായ യുവാവിനോടൊപ്പം വീടുവിട്ടിറങ്ങിയ വളപട്ടണം സ്വദേശിനിയായ യുവതിയെ കോടതി സ്വന്തം ഇഷ്​ടപ്രകാരം ഇഷ്​ടമുള്ള ആളോടൊപ്പം ജീവിക്കാൻ അനുവദിച്ചു. വളപട്ടണം സ്വദേശിനിയായ ഷഹാനയാണ്​ കഴിഞ്ഞ 16 മുതൽ ആറ്റിങ്ങൽ സ്വദേശിയായ ഹാരിസണിനൊപ്പം വീടുവിട്ടത്​. ഇവരെ ചിലർ ഫോൺ വിളിച്ചു ഭീഷണിപ്പെടുത്തുന്നതായി അറിയിച്ച്​​ ഇരുവരും സോഷ്യൽ മീഡിയയിൽ ലൈവിലൂടെ രംഗത്തെത്തിയിരുന്നു. 

ഇതേതുടർന്ന്​ ആറ്റിങ്ങലിലെ സി.പി.എം ​പ്രവർത്തകരുടെ സഹായത്തോടെ ആറ്റിങ്ങൽ പൊലീസിൽ ഹാജരായ ഷഹാനയെ വെള്ളിയാഴ്​ചയാണ്​ വളപട്ടണം സ്​റ്റേഷനിലെത്തിച്ചത്​. വളപട്ടണം പൊലീസ്​ കണ്ണൂർ അഡീഷണൽ ചീഫ്​ ജുഡീഷ്യൽ മജിസ്​ട്രേറ്റ്​ കോടതിയിൽ ഷാഹാനയെ ഹാജരാക്കി. ഹാരിസണിനൊപ്പം ജീവിക്കാൻ അനുവദിക്കണമെന്ന്​ ഷഹാന കോടതിയോട്​ ആവശ്യപ്പെട്ടു. ഇതേതുടർന്ന്​ കോടതി ഇവരെ സ്വന്തം ഇഷ്​ടത്തിന് വിട്ടയച്ചു.