ഹനാനെ സമൂഹമാധ്യമങ്ങളിലൂടെ അധിക്ഷേപിച്ച സംഭവം: ഒരാൾ അറസ്​റ്റിൽ

കൊച്ചി: മത്സ്യവിൽപന നടത്തി ഉപജീവന മാർഗം തേടിയ കോളജ് വിദ്യാർഥിനി ഹനാനെതി​െര സമൂഹ മാധ്യമങ്ങളിലൂടെ അപകീർത്തികരമായ പരാമർശം നടത്തിയ സംഭവത്തിൽ യുവാവ്​ അറസ്​റ്റിൽ. ഗുരുവായൂർ ചെറായി പൈനാട്ടായിൽ വിശ്വനാഥനാണ്(42) പിടിയിലായത്. അശ്ലീലച്ചുവയുള്ള പരാമർശമാണ്​ ഇയാൾ ഹനാനെതിരെ നടത്തിയത്. വിശ്വൻ ചെറായി എന്ന പേരിലുള്ള ഫേസ്ബുക്ക് അക്കൗണ്ടിലൂടെയായിരുന്നു അധിക്ഷേപം. പെൺകുട്ടിയെ അപമാനിച്ചതിന്​ ഐ.ടി ആക്ട് പ്രകാരമാണ് കേസ്. കോടതിയിൽ ഹാജരാക്കിയ പ്രതിയെ 14 ദിവസത്തേക്ക് റിമാൻഡ് ചെയ്തു. 

ഹനാനെതിരെ ഫേസ്ബുക്കിൽ ആദ്യ പോസ്​റ്റിട്ട വയനാട് സ്വദേശി നൂറുദ്ദീൻ ഷേഖിനെ പൊലീസ് കഴിഞ്ഞദിവസം കസ്​റ്റഡിയിലെടുത്ത് ചോദ്യം ചെയ്ത് വിട്ടയച്ചിരുന്നു. അന്വേഷണത്തിന്​ ഇയാളെ വീണ്ടും വിളിച്ചുവരുത്തുമെന്നാണ് പൊലീസ് അറിയിച്ചത്. നൂറുദ്ദീൻ ഷേഖിനെ ചോദ്യം ചെയ്തതിൽനിന്ന്​ ലഭിച്ച വിവരങ്ങളുടെ അടിസ്ഥാനത്തിൽ കൂടുതൽ പേരെ നിരീക്ഷിച്ചുവരികയാണ്. വരും ദിവസങ്ങളിൽ കൂടുതൽ അറസ്​റ്റ്​ ഉണ്ടാകുമെന്നും പൊലീസ് പറഞ്ഞു. തന്നെ ഓൺലൈൻ മാധ്യമപ്രവർത്തകൻ തെറ്റിദ്ധരിപ്പിച്ചെന്ന് നൂറുദ്ദീൻ ഷേഖ്​ മൊഴി നൽകിയിരുന്നു. ഇതും അന്വേഷിക്കുന്നുണ്ട്. 

സൈബർ സെല്ലി​​െൻറ സഹായത്തോടെ നടത്തിയ അന്വേഷണത്തിൽ ഗുരുതര പരാമർശങ്ങൾ നടത്തിയ 10 പേരെ പൊലീസ് തിരിച്ചറിഞ്ഞിട്ടുണ്ട്. നിരവധി ആളുകളുടെ ഫേസ്ബുക്ക് പോസ്​റ്റുകൾ ശേഖരിച്ച് പരിശോധിച്ചുവരികയാണ്. അശ്ലീല പോസ്​റ്റിട്ടവർക്കെതിരെയാണ് ആദ്യഘട്ടത്തിൽ നടപടി. നിരവധിയാളുകൾ ഇതിനകം പോസ്​റ്റുകൾ ഫേസ്ബുക്കിൽനിന്ന് നീക്കിയിട്ടുണ്ട്. അതേസമയം പരാമർശങ്ങളടങ്ങുന്ന സ്ക്രീൻ ഷോട്ടുകൾ പൊലീസ് പരിശോധിച്ചുവരികയാണ്. മത്സ്യക്കച്ചവടം നാടകമാണെന്നും സിനിമയുടെ പ്രചാരണമാണ് ലക്ഷ്യമെന്നും ആരോപിച്ച് നിരവധി ആളുകളാണ് ഹനാനെതിരെ സമൂഹമാധ്യങ്ങളിൽ അധിക്ഷേപവുമായി രംഗത്തെത്തിയത്.