കൊല്ലത്ത് റോഡരികിൽ വെടിയുണ്ടകൾ; കണ്ണൂരിൽ വാഹനപരിശോധനയിലും വെടിയുണ്ട കണ്ടെത്തി

കണ്ണൂർ / കുളത്തൂപ്പുഴ: തിരുവനന്തപുരം-ചെങ്കോട്ട അന്തർസംസ്ഥാനപാതയിൽ കുളത്തൂപ്പുഴക്ക് സമീപം കല്ലുവെട്ടാംകുഴി വനത്തിനോട്​ ചേർന്ന്​ പാതയോരത്ത്​ പ്ലാസ്​റ്റിക് കവറിൽ പൊതിഞ്ഞ നിലയിൽ 14 വെടിയുണ്ടകൾ കണ്ടെത്തി. കഴിഞ്ഞദിവസം വ ൈകീട്ട്​ 3.30ഒാടെ മുപ്പത്തെട്ടടി പാലത്തിനുസമീപം വഴിയാത്രക്കാരാണ് വൃത്തിയായി പൊതിഞ്ഞ കവർ കണ്ടത്. തുറന്ന് പരിശോ ധിച്ചപ്പോൾ വെടിയുണ്ടകളാണെന്ന് തിരിച്ചറിഞ്ഞതോടെ പൊലീസിൽ വിവരമറിയിക്കുകയായിരുന്നു. കുളത്തൂപ്പുഴ എസ്.ഐ ജയകുമാറി​െൻറ നേതൃത്വത്തിൽ പൊലീസ് എത്തി വെടിയുണ്ടകൾ കസ്​റ്റഡിയിലെടുത്തു.

അഞ്ചൽ വനം റേഞ്ചിൽ ഉൾപ്പെട്ട പ്രദേശമാണിത്​. തിരകൾ ഉപയോഗ യോഗ്യമായവയാണോ, ഏതുതരം തോക്കിൽ ഉപയോഗിക്കുന്നവയാണ് എന്നീ കാര്യങ്ങളറിയാൻ ഫോറൻസിക്, സാങ്കേതിക വിദഗ്ധരുടെ സഹായം തേടി. റൂറൽ എസ്.പിയുടെ നിർദേശപ്രകാരം കുളത്തൂപ്പുഴ പൊലീസും സ്പെഷൽ ബ്രാഞ്ചും അന്വേഷണം ആരംഭിച്ചു. പ്രദേശത്തെ ലൈസൻസുള്ള തോക്കുടമകളോടും വിവരം ആരാഞ്ഞിട്ടുണ്ട്.

ഇതിനുപിന്നാലെ, ഇരിട്ടി വീരാജ്പേട്ടയിൽനിന്ന്​ കാറിൽ കേരളത്തിലേക്ക് കടത്തുകയായിരുന്ന 60 നാടൻ തോക്കിൻതിരകളുമായി തില്ലങ്കേരി സ്വദേശി പിടിയിലായി. തില്ലങ്കേരി മച്ചൂർ മലയിലെ കെ. പ്രമോദിനെയാണ് (42) കിളിയന്തറ എക്സൈസ് ഇൻസ്‌പെക്ടർ ബി. വിഷ്ണുവി​ന്‍റെ നേതൃത്വത്തിൽ പിടികൂടിയത്.

ശനിയാഴ്ച വൈകീട്ട്​ മൂ​േന്നാടെ എക്സൈസ് സംഘം നടത്തിയ വാഹന പരിശോധനക്കിടെയാണ് കാറിൽ കടത്തുകയായിരുന്ന തിരകൾ കണ്ടെത്തിയത്. കാറി​​െൻറ ഡിക്കിക്കടിയിൽ ഒളിപ്പിച്ച നിലയിലായിരുന്നു തിരകൾ. ഒരു പെട്ടിയിൽ പത്തെണ്ണമെന്ന നിലയിൽ ആറുപെട്ടികളാണുണ്ടായിരുന്നത്. കൃഷി നശിപ്പിക്കുന്ന പന്നികളെയും കുരങ്ങന്മാരെയും തുരത്തുന്നതിനാണ് ഇവ കൊണ്ടുവന്നതെന്ന് പ്രതി പറഞ്ഞതായി എക്സൈസ് ഇൻസ്‌പെക്ടർ അറിയിച്ചു. കൂടുതൽ അന്വേഷണത്തിനായി പ്രതിയെയും തിരകളും കാറും ഇരിട്ടി പൊലീസിന് കൈമാറി.