കാട്ടുപന്നികളെ കൊല്ലാൻ അധികാരം നൽകിയ സർക്കാർ നടപടി നിയമാനുസൃതമല്ല -ഹൈകോടതി

കൊച്ചി: ജനവാസ കേന്ദ്രങ്ങളിലിറങ്ങുന്ന കാട്ടുപന്നികളെ കൊല്ലാൻ ത‌‌ദ്ദേശസ്ഥാപന മേധാവികൾക്ക്​ അധികാരം നൽകിയ സർക്കാർ നടപടി നിയമാനുസൃതമല്ലെന്ന്​ ഹൈകോടതി. സർക്കാർ ഉത്തരവ് വന്യജീവി സംരക്ഷണ നിയമത്തിലെ വ്യവസ്ഥകൾക്ക് വിരുദ്ധമാണെന്ന് സംശയമുണ്ടെന്നും​ ജസ്റ്റിസ് എ.കെ. ജയശങ്കരൻ നമ്പ്യാർ, ജസ്റ്റിസ് പി. ഗോപിനാഥ് എന്നിവരടങ്ങുന്ന ഡിവിഷൻ ബെഞ്ച്​ വ്യക്തമാക്കി.

പഞ്ചായത്ത് പ്രസിഡന്റുമാർക്കടക്കം ഓണററി വൈൽഡ് ലൈഫ് വാർഡൻ എന്ന ചുമതല നൽകിയത് സംബന്ധിച്ച ഉത്തരവിൽ വ്യക്തത വേണം. മറ്റ് വന്യജീവികളും ജനവാസ കേന്ദ്രങ്ങളിൽ ഭീഷണി സൃഷ്ടിക്കുന്ന സാഹചര്യത്തിൽ സർക്കാർ വ്യക്തവും സമഗ്രവുമായ നയം രൂപവത്​കരിക്കുന്നതാണ് ഉചിതമെന്നും ഇക്കാര്യത്തിൽ സർക്കാർ രണ്ടാഴ്ചക്കകം സത്യവാങ്മൂലം സമർപ്പിക്കണമെന്നും കോടതി നിർദേശിച്ചു.

മനുഷ്യ-വന്യജീവി സംഘർഷത്തിന്‍റെ പശ്ചാത്തലത്തിൽ​ കോടതി സ്വമേധയാ സ്വീകരിച്ച ഹരജിയിൽ പഞ്ചായത്ത് പ്രസിഡന്റുമാർക്കടക്കം ഓണററി വൈൽഡ് ലൈഫ് വാർഡൻ എന്ന ചുമതല നൽകിയ നടപടിക്കെതിരെ സന്നദ്ധ പ്രവർത്തകരായ എം.എൻ. ജയചന്ദ്രൻ, പ്രീതി ശ്രീവൽസൻ എന്നിവരുന്നയിച്ച ആവശ്യമാണ്​​ കോടതി പരിഗണിച്ചത്​.

മനുഷ്യജീവനും കൃഷിക്കും ഭീഷണിയാകുന്ന കാട്ടുപന്നികളുടെ എണ്ണം പെരുകാതെ നിയന്ത്രിക്കേണ്ടതാണെങ്കിലും തോക്ക്​ ലൈസൻസുള്ള ചിലരെ തദ്ദേശസ്ഥാപന മേധാവികൾ ഇതിനായി നിയോഗിക്കുന്ന രീതിയാണ്​ നിലവിൽ​.

നിയമത്തിൽ ചീഫ് വൈൽഡ് ലൈഫ് വാർഡനോ വാർഡൻ ചുമതലപ്പെടുത്തുന്ന നിശ്ചിത യോഗ്യതയുള്ളയാളോ അനുമതി നൽകണമെന്നാണ് പറയുന്നത്. കാട്ടുപന്നികളെ വെടിവെക്കാൻ എല്ലാവർക്കും അനുമതി നൽകാനാവില്ല. ശ്രദ്ധയോടെ എടുക്കേണ്ട തീരുമാനമാണത്​. ഇതിനുള്ള നടപടികൾ നിയ​മപ്രകാരമായിരിക്കണം. ഇങ്ങനെ നൽകുന്ന ചുമതല ദുരുപയോഗപ്പെടുത്താനും തോക്കുകൾ നിയമവിരുദ്ധ പ്രവർത്തനങ്ങൾക്ക് ഉപയോഗിക്കാനും സാധ്യതയുണ്ട്​.

ചുമതലപ്പെടുത്തുന്നവരുടെ യോഗ്യതയും വിശ്വാസ്യതയും ഉറപ്പുവരുത്താനാവു​ന്നതെങ്ങനെയെന്ന്​ ​സർക്കാർ അറിയിക്കണം. കൊല്ലുന്ന വന്യമൃഗങ്ങളുടെ ശരീരം കണ്ടെത്തി നശിപ്പിക്കുന്നുണ്ടെന്ന് ഉറപ്പുവരുത്തുകയും വേണം. കാട്ടുപന്നികളടക്കം വന്യജീവികളെ ആകർഷിക്കുന്ന പ്ലാവ്, പൈനാപ്പിൾ, കിഴങ്ങ് കൃഷികൾ വനാതിർത്തിയോട്​ ചേർന്ന്​ ​ചെയ്യുന്നത്​ ഒഴിവാക്കലാണ്​ നല്ലതെന്നും കോടതി അഭിപ്രായപ്പെട്ടു.