ഉദ്യോഗസ്ഥ സംവരണം പുനഃക്രമീകരണം പരിഗണനയി​​ലില്ല -കെ. രാധാകൃഷ്​ണൻ

തിരുവനന്തപുരം: നിലവിലെ ഉദ്യോഗസ്ഥ സംവരണം പുനഃക്രമീകരിക്കുന്നത്​ പരിഗണിക്കുന്നില്ലെന്ന്​ മന്ത്രി കെ. രാധാകൃഷ്​ണൻ അറിയിച്ചു. ജനസംഖ്യാനുപാതികമായി സംവരണം വേണമെന്ന ദലിത് ക്രിസ്ത്യൻ ആവശ്യത്തിൽ ഇടപെടാൻ കഴിയില്ല. സംസ്ഥാനത്തെ ദലിത് ക്രിസ്ത്യൻ വിഭാഗങ്ങളിലുള്ളവരുൾപ്പെടെ വിവിധ ജാതിവിഭാഗങ്ങളുടെ ജനസംഖ്യാനുപാതിക കണക്ക് ലഭ്യവുമല്ല. ഇക്കാരണത്താൽ നിയമനങ്ങളിലെ സംവരണക്രമത്തിൽ പുനഃക്രമീകരണം നിലവിൽ സാധ്യമല്ല. ഒ.ബി.സി ഏകദേശം 65 ശതമാനമുണ്ടെന്നാണ്​ കണക്കാക്കുന്നതെന്നും നിയമസഭയിൽ മോൻസ് ജോസഫി​െൻറ ശ്രദ്ധക്ഷണിക്കലിന്​ മറുപടി നൽകി.

ദലിത് ക്രിസ്ത്യൻ വിഭാഗങ്ങൾക്ക് സംസ്ഥാന നിയമനത്തിൽ ലാസ്​റ്റ്​ ഗ്രേഡിൽ രണ്ടു ശതമാനവും മറ്റ് തസ്തികകളിൽ ഒരു ശതമാനവും സംവരണം നൽകുന്നുണ്ട്. വിദ്യാഭ്യാസമുൾപ്പെടെ കാര്യങ്ങളിൽ ഒ.ഇ.സി വിഭാഗത്തിൽപെടുത്തി ലംപ്സം ഗ്രാൻഡ്, ഹോസ്​റ്റൽ ഫീസ് തുടങ്ങി വിവിധ ആനുകൂല്യങ്ങളും നൽകുന്നു. മെഡിക്കൽ പി.ജി. പ്രവേശനത്തിൽ മറ്റ് പരിവർത്തിത വിഭാഗങ്ങൾക്കൊപ്പം സംവരണവും നൽകുന്നു. ഇവരെ പട്ടികജാതിവിഭാഗത്തിൽ ഉൾപ്പെടുത്തുന്ന കാര്യത്തിൽ കേന്ദ്രസർക്കാറാണ് തീരുമാനമെടുക്കേണ്ടതെന്നും മന്ത്രി കൂട്ടിച്ചേർത്തു.