രാജാവിനെക്കാൾ വലിയ രാജഭക്തി കാട്ടി പിണറായിക്ക്​ വിധേനായി ഗവർണർ നിൽക്കുന്നു -വി.ഡി. സതീശൻ

തിരുവനന്തപുരം: ഗവർണറെ കടന്നാക്രമിച്ച്​ പ്രതിപക്ഷ നേതാവ്​ വി.ഡി. സതീശൻ. ബി.ജെ.പി നേതാക്കൾ എഴുതിക്കൊടുക്കുന്നതാണ്​​ ഗവർണർ വായിക്കുന്നതെന്ന്​​ കുറ്റപ്പെടുത്തിയ അദ്ദേഹം, അനാവശ്യ സമ്മർദങ്ങൾക്ക്​ വഴങ്ങി സർക്കാറിന്‍റെ തെറ്റായ നടപടികൾക്ക്​ ഗവർണർ കൂട്ടുനിൽക്കുകയാണെന്നും ആരോപിച്ചു.

സർവകലാശാലകളെ രാഷ്ട്രീയവത്​കരിക്കാനുള്ള സർക്കാർ ശ്രമങ്ങൾക്ക്​ ഗവർണർ കുടപിടിക്കുകയായിരുന്നു. രാജാവിനെക്കാൾ വലിയ രാജഭക്തി കാട്ടി പിണറായി വിജയന്​ വിധേനായി നിൽക്കുന്നു​. കണ്ണൂർ വി.സി നിയമനത്തെ ആദ്യം ന്യായീകരിച്ച ഗവർണർ തെറ്റ്​ പറ്റി​യെന്ന്​ പിന്നീട്​ സമ്മതിച്ചെങ്കിലും തിരുത്താൻ തയാറാകുന്നില്ല. നിയമപരമായി ചെയ്യേണ്ട കാര്യങ്ങൾ ചെയ്യില്ലെന്നാണ്​ അദ്ദേഹം പറയുന്നത്​. ഗവർണർക്ക്​​ മുഖ്യമന്ത്രിയെ ഭയമാണ്​.

ഗവർണർ വിമർശനത്തിന്​ അതീതനല്ല. ഭരണഘടനാപരമായും നിയമപരമായും തെറ്റ്​ ആവർത്തിച്ചാൽ ഗവർണറെ വീണ്ടും വിമർ​ശിക്കും. ഭരണഘടനാ പദവിയിൽ ഇരിക്കുന്നവർ അതിന്‍റെ അന്തസ്സിന്​ അനുസരിച്ച്​ പെരുമാറണം. രാഷ്ട്രപതിക്ക്​ ഡി.ലിറ്റ്​ നൽകാൻ സര്‍വകലാശാലയോട്​ ശിപാര്‍ശ ചെയ്‌തോയെന്ന് ഗവർണർ വായ തുറന്ന്​ പറയണം. അതിന്​ പകരം വായക്ക്​ മുദ്രവെച്ചെന്ന്​ പറഞ്ഞിട്ട്​ കാര്യമില്ല. പറയാൻ ബാധ്യതപ്പെട്ടതൊഴികെ എല്ലാം അദ്ദേഹം പറയുന്നുണ്ട്​.

നിയമപരമായി ഗവർണറാണ്​ ഇപ്പോഴും സർവകലാശാലകളുടെ ചാൻസലർ. ഹൈകോടതി ചാൻസലർക്ക്​ നോട്ടീസ്​ അയച്ചാൽ സ്വീകരിക്കില്ലെന്ന്​ പറയാൻ അദ്ദേഹത്തിന്​ എന്ത്​ അധികാരം. ചാന്‍സലറുടെ അധികാരം ഗവർണർ ഉപയോഗിച്ചാല്‍ കണ്ണൂർ വി.സി പുറത്താകും. സര്‍ക്കാറിനെതിരെ പ്രവര്‍ത്തിക്കാന്‍ തയാറല്ലാത്തതിനാലാണ് ചാന്‍സലര്‍ പദവി വേണ്ടെന്ന്​ ഗവര്‍ണര്‍ പറയുന്നത്.

രാഷ്ട്രപതിക്ക്​ ഡി.ലിറ്റ്​ നൽകാൻ ശിപാർശ ചെയ്തിട്ടു​​ണ്ടെങ്കിൽ അത്​ ശരിയായ രീതിയിലായിരുന്നില്ല. മറിച്ചായിരുന്നെങ്കിൽ സിൻഡിക്കേറ്റിൽ ചർച്ച ചെയ്യാതിരിക്കാൻ കഴിയുമായിരുന്നില്ല. ഡി.​ലിറ്റിന്​ ഗവര്‍ണര്‍ ശിപാര്‍ശ ചെയ്‌തോ, സിന്‍ഡിക്കേറ്റ് ചര്‍ച്ച ചെയ്‌തോ എന്നൊക്കെയാണ് രമേശ് ചെന്നിത്തലയും ചോദിച്ചത്.

കോണ്‍ഗ്രസിലെ ഏറ്റവും മുതിര്‍ന്ന നേതാവായ ചെന്നിത്തല അഭിപ്രായപ്രകടനം നടത്തിയാല്‍ എന്താണ് തെറ്റ്? അദ്ദേഹത്തിന്‍റെ അഭി​പ്രായങ്ങളെ താനോ തന്‍റെ അഭി​​പ്രായങ്ങളെ അദ്ദേഹമോ തള്ളിയിട്ടില്ല. മറിച്ചുള്ളത്​ വ്യാഖ്യാനങ്ങളാണ്​. ചെന്നിത്തലയ്ക്കും പ്രതിപക്ഷ നേതാവിനും കെ.പി.സി.സി അധ്യക്ഷനും ഒരേ നിലപാടാണെന്നും സതീശൻ പറഞ്ഞു.