ഗവര്‍ണര്‍ ബി.ജെ.പി വക്താവ്, സ്ഥിരതയില്ലാത്ത വ്യക്തി -വി.ഡി. സതീശൻ

തിരുവനന്തപുരം: ഗവര്‍ണര്‍ ബി.ജെ.പിയുടെ വക്താവായി മാറിയിരിക്കുകയാണെന്ന്​ പ്രതിപക്ഷനേതാവ്​ വി.ഡി. സതീശൻ. നേരത്തെ കേന്ദ്രമന്ത്രി വി. മുരളീധരനും ബി.ജെ.പി അധ്യക്ഷനും പറഞ്ഞിരുന്ന കാര്യങ്ങളാണ് ഇപ്പോള്‍ ഗവര്‍ണര്‍ പറയുന്നത്. ഗവര്‍ണര്‍ പദവിയെ ബി.ജെ.പി വക്താവ് സ്ഥാനമാക്കി അദ്ദേഹം തരംതാഴ്ത്തി​. പറയുന്ന ഒരു കാര്യത്തിലും സ്ഥിരതയില്ലാത്ത വ്യക്തിയാണ് ഗവര്‍ണറെന്നും അദ്ദേഹം പറഞ്ഞു.

ഹൈകോടതി സില്‍വര്‍ ലൈനിന് അനുമതി നല്‍കിയെന്ന്​ സര്‍ക്കാര്‍ പ്രചരിപ്പിക്കുന്നത് തെറ്റാണ്. സർവേ ആന്‍ഡ് ബൗണ്ടറീസ് ആക്ടിലെ ആറാം വകുപ്പനുസരിച്ച് സര്‍വേ നടത്താന്‍ അനുമതിയുണ്ടോയെന്ന വിഷയമാണ് ഹൈകോടതി പരിഗണിച്ചത്. സിംഗില്‍ ബെഞ്ച് സര്‍വേ നടത്താന്‍ പറ്റില്ലെന്ന്​ വിധിച്ചു. എന്നാല്‍ ഡിവിഷന്‍ ബെഞ്ച് അനുമതി നല്‍കി.

കേന്ദ്ര സര്‍ക്കാറിന്റെയും റെയിൽവേ മന്ത്രാലയത്തിന്റെയും അനുമതിയില്ലാതെ സ്ഥലം ഏറ്റെടുക്കില്ലെന്ന് സര്‍ക്കാറിന്​ വേണ്ടി അഡ്വക്കറ്റ് ജനറല്‍ ഉറപ്പുനല്‍കിയതിനെ തുടര്‍ന്നാണ് സാമൂഹികാഘാത പഠനം നടത്താന്‍ മാത്രം ഹൈകോടതി അനുമതി നല്‍കിയത്. സില്‍വര്‍ ലൈന്‍ സമരവുമായി യു.ഡി.എഫ്​ മുന്നോട്ടുപോകും. പിണറായി സര്‍ക്കാറിന്റെ തുടര്‍ഭരണം എല്ലാ പോഷക സംഘടനകളിലും ഉണ്ടാക്കിയ അഹങ്കാരത്തിന്റെയും ധാർഷ്ട്യത്തിന്റെയും ഫലമായാണ് കണ്ണൂരിലെ വ്യവസായ സ്ഥാപനം പൂട്ടിയതെന്നും അദ്ദേഹം കുറ്റപ്പെടുത്തി.