സർക്കാർ ജീവനക്കാരുടെ സ്​ത്രീധനവിരുദ്ധ സാക്ഷ്യപത്രം: വ്യവസ്ഥ നിർബന്ധമാക്കിയതായി സർക്കാർ ഹൈകോടതിയിൽ

കൊച്ചി: സർക്കാർ ജീവനക്കാർ വിവാഹത്തിന് ഒരു മാസം മുമ്പ് സ്​ത്രീധനവിരുദ്ധ സാക്ഷ്യപത്രം നൽകണമെന്ന വ്യവസ്ഥ നിർബന്ധമാക്കി ഉത്തരവ്​ പുറപ്പെടുവിച്ചതായി സർക്കാർ ഹൈകോടതിയിൽ. സ്ത്രീധനം വാങ്ങുകയോ കൊടുക്കുകയോ പ്രേരിപ്പിക്കുകയോ ചെയ്യില്ലെന്ന സാക്ഷ്യപത്രം ഉദ്യോഗസ്ഥരിൽനിന്ന് വാങ്ങി സ്ഥാപന മേധാവികൾ സൂക്ഷിക്കണമെന്ന്​ ജൂലൈ 16ന് പുറപ്പെടുവിച്ച ഉത്തരവിലുണ്ടെന്ന്​ വനിത ശിശു വികസന ഡയറക്ടർ ടി.വി. അനുപമ നൽകിയ സത്യവാങ്മൂലത്തിൽ പറയുന്നു.

സ്ത്രീധനവിരുദ്ധ പ്രവർത്തനങ്ങൾക്കായി ജില്ലകൾതോറും ഒാഫിസർമാരെയും സംസ്ഥാനതലത്തിൽ ചീഫ് ഒാഫിസറെയും നിയമിച്ചിട്ടുണ്ടെന്നും വ്യക്തമാക്കിയിട്ടുണ്ട്​. സ്ത്രീധന നിരോധനനിയമവും ചട്ടങ്ങളും ഫലപ്രദമായി നടപ്പാക്കുന്നില്ലെന്ന്​ ആരോപിച്ച് പെരുമ്പാവൂർ സ്വദേശി ഡോ. ഇന്ദിര രാജൻ നൽകിയ പൊതുതാൽപര്യ ഹരജിയിലാണ് സർക്കാറി​െൻറ വിശദീകരണം.

സ്ത്രീധന നിരോധന പ്രവർത്തനങ്ങളിൽ ജില്ലതലത്തിൽ പ്രവർത്തിക്കാൻ തയാറുള്ള സംഘടനകളിൽനിന്ന് ജൂലൈ 15ന് അപേക്ഷ ക്ഷണിച്ചിരുന്നതായി വിശദീകരണത്തിൽ പറയുന്നു. നടപടി ​ഇൗ മാസം പൂർത്തിയാക്കും. വനിത ശിശുവികസന ഡയറക്ടറാണ് ചീഫ് ഒാഫിസർ. നവംബർ 26 സ്ത്രീധന വിരുദ്ധ പ്രചാരണദിനമായി ആചരിക്കും. അന്നേ ദിവസം ഹൈസ്കൂൾ, ഹയർ സെക്കൻഡറി, -കോളജ് വിദ്യാർഥികൾ പ്രതിജ്ഞ എടുക്കണമെന്ന് നിർദേശിച്ചിട്ടുണ്ട്. സ്ത്രീധനവുമായി ബന്ധപ്പെട്ട് വളരെ കുറച്ച്​ പരാതികളാണ് ലഭിക്കുന്നത്​. വിവരങ്ങൾ വെളിപ്പെടുത്താനുള്ള താൽപര്യക്കുറവാണ് ഇത്​ വ്യക്തമാക്കുന്നതെന്നും സത്യവാങ്മൂലത്തിൽ പറയുന്നു. ചീഫ് ജസ്​റ്റിസ് അടങ്ങുന്ന ഡിവിഷൻ ബെഞ്ച്​ ഹരജി പിന്നീട്​ പരിഗണിക്കാൻ മാറ്റി.