സർക്കാറും ​പൊലീസും രണ്ടുതരം നീതി​ നടപ്പാക്കുന്നു -​വി.ഡി. സതീശൻ

തിരുവനന്തപുരം: സംസ്ഥാനത്ത്​ പൊലീസ്​ രണ്ടുതരം നീതിയാണ്​ നടപ്പാക്കുന്നതെന്ന്​ പ്രതിപക്ഷ നേതാവ്​ വി.ഡി. സതീശൻ. സ്വർണക്കടത്ത്​ വിഷയത്തിൽ സമരം ശക്തമാക്കുമെന്നും അദ്ദേഹം വാർത്തസമ്മേളനത്തിൽ അറിയിച്ചു.

പൂന്തുറ എസ്​.ഐയെ ഡി.വൈ.എഫ്​.ഐക്കാർ പിന്നിൽനിന്ന്​ തലക്കടിച്ച്​ കൊല്ലാൻ ശ്രമിച്ചിട്ടും വധശ്രമത്തിന്​ കേസെടുക്കാത്ത പൊലീസ്​, വിമാനത്തിൽ 'പ്രതിഷേധമെന്ന്​' രണ്ട്​ തവണ മുദ്രാവാക്യം വിളിച്ച യൂത്ത്​ കോൺഗ്രസുകാർക്കെതിരെ വധശ്രമത്തിന്​ കേസെടുത്തു. സി.പി.എം അനുഭാവിയായ പൊലീസ്​ അസോസിയേഷൻ നേതാവിന്‍റെ അധികാര പരിധിയിലാണ്​ ഈ രണ്ട്​ സംഭവങ്ങളും നടന്നിട്ടുള്ളത്​. സ്വർണക്കടത്തിലെ വെളിപ്പെടുത്തലിനെ തുടർന്ന്​ അകപ്പെട്ട പടുകുഴിയിൽനിന്ന്​ മുഖ്യമന്ത്രിയെ രക്ഷി​ച്ചെടുക്കുന്നതിന്​ ശ്രദ്ധതിരിക്കാനുള്ള ശ്രമമാണ്​ ഇപ്പോൾ നടക്കുന്നത്​. സര്‍ക്കാറിന്റെ ചില്ലിക്കാശും ഔദാര്യവും കൈപ്പറ്റി സാംസ്‌കാരിക വേഷമിട്ട് നടക്കുന്നവരാണ് മുഖ്യമന്ത്രിയെ സംരക്ഷിക്കാന്‍ ഇപ്പോള്‍ തെരുവില്‍ ഇറങ്ങിയിട്ടുള്ളത്.

വധഭീഷണി മുഴക്കിയാൽ താനും കെ.പി.സി.സി പ്രസിഡന്‍റും ഭയന്ന്​ പിന്മാറുമെന്നത്​ മുഖ്യമന്ത്രിയുടെ വ്യാമോഹമാണ്​. ശക്തമായ സമരവുമായി യു.ഡി.എഫ്​ മുന്നോട്ടുപോകും. മുഖ്യമന്ത്രിക്കെതിരെ ഉയർന്ന ആരോപണം തെറ്റാണെന്ന്​ വാദിക്കാൻ ഭരണപക്ഷത്തെ ആരും തയാറായിട്ടില്ല. മുഖ്യമന്ത്രിയെ ആക്രമിക്കാൻ ആരെങ്കിലും ശ്രമിച്ചാൽ അതിനെതിരെ ആദ്യം നിലപാടെടുക്കുക പ്രതിപക്ഷ നേതാവായിരിക്കും. മുഖ്യമന്ത്രി പോയശേഷമാണ്​ വിമാനത്തിൽ പ്രതിഷേധമുണ്ടായതെന്ന്​ ഇ.പി. ജയരാജൻ സംഭവം കഴിഞ്ഞയുടൻ പറഞ്ഞിരുന്നു. കോടിയേരിയും അക്കാര്യം ​പ്രസംഗിച്ചു. വധശ്രമം ആരോപിച്ച്​ വ്യാജകേസ്​ എടുക്കുന്നതിന്‍റെ ഭാഗമായി​ പിന്നീട്​ ഇരുവരും അഭിപ്രായം മാറ്റുകയായിരുന്നു.

ലോക കേരളസഭ ബഹിഷ്​കരിക്കാൻ യു.ഡി.എഫ്​ തീരുമാനിച്ചത്​ ഐകകണ്​ഠ്യേനയാണ്​. നൂറുകണക്കിന്​ യു.ഡി.എഫ്​ പ്രവർത്തകർ അക്രമത്തിൽ പരിക്കേറ്റ്​ ആശുപത്രിയിൽ കിടക്കുമ്പോൾ ലോക കേരളസഭയുമായി സഹകരിക്കാൻ തക്ക വിശാല മനസ്സ്​​ യു.ഡി.എഫിനില്ലെന്നും സതീശൻ പറഞ്ഞു.