ആലപ്പുഴയിൽ ഗുണ്ടാനേതാവിനെ അടിച്ചുകൊന്നു

കൈനഗരി (ആലപ്പുഴ): ഗുണ്ടാനേതാവ്​ പുന്നമട അഭിലാഷ്​ കൊല്ലപ്പെട്ടു. രണ്ട്​ കൊലപാതകക്കേസ്​ ഉൾപ്പെടെ 25 കേസുകളിൽ പ്രതിയായ അഭിലാഷിനെ വീട്ടിൽ കയറി അടിച്ചുകൊല്ലുകയായിരുന്നു.

ഇന്ന്​ രാവിലെ കൈനഗരി തേവർകാട്ടുള്ള ഭാര്യ വീട്ടിൽ വെച്ചാണ്​ ആക്രമിക്കപ്പെട്ടത്​. മാരകമായി പരിക്കേറ്റ അഭിലാഷിനെ ഭാര്യ ദീപ്​തി​ ആലപ്പുഴ ജനറൽ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല​. മരിച്ച അഭിലാഷിന്​ ഒരു മകനുണ്ട്.

കൈനഗരി സ്വദേശിയായ മജുവാണ്​ ആക്രമണത്തിന്​ പിന്നിലെന്ന്​ പൊലീസ്​ പറഞ്ഞു. അഭിലാഷിന്‍റെ സംഘത്തിൽ അംഗമായിരുന്ന മജു നിരവധി കേസുകളിൽ പ്രതിയാണ്​.

നെടുമുടി, ആലപ്പുഴ നോർത്ത് സ്​റ്റേഷനുകളിൽ അഭിലാഷിനെതിരെ രണ്ട്​ കൊലപാതകക്കേസുകളുണ്ട്​. കൈനകരി അനിയൻ വധക്കേസിൽ വിചാരണ കഴിഞ്ഞു നിൽക്കുകയായിരുന്നു.

കുട്ടനാട്ടിൽ മാത്രം 15 കേസുകളും പുളിങ്കുന്ന്, നെടുമുടി, ആലപ്പുഴ സൗത്ത്, നോർത്ത് സ്റ്റേഷനുകളിലായി ഇരുപത്തഞ്ചോളം കേസുകളും അഭിലാഷിനെതിരെ ഉണ്ടായിരുന്നു.