സ്വർണക്കടത്ത്​; കരിപ്പൂരിലെത്തിയത്​ മൂന്ന്​ സംഘമെന്ന്​ കസ്​റ്റംസ്​

കൊച്ചി: സ്വർണക്കടത്തുമായി ബന്ധപ്പെട്ട്​ മൂന്ന്​ സംഘം കരിപ്പൂർ വിമാനത്താവളത്തിലെത്തിയെന്ന്​ കസ്​റ്റംസ്​. സ്വർണം തട്ടിയെടുക്കാൻ അർജുൻ ആയങ്കിയുടെയും സുഫിയാ​െൻറയും സംഘത്തിന്​ പുറമെ മറ്റൊരു കൂട്ടർകൂടി എത്തിയതായി ഒന്നാം പ്രതി മുഹമ്മദ്​ ​െഷഫീഖ്​ മേലേതിലാണ്​​ വെളിപ്പെടുത്തിയത്​.

കസ്​റ്റഡിയിലെ ചോദ്യം ചെയ്യലിനുശേഷം തിരികെ ഹാജരാക്കിയ ഇയാളെ എറണാകുളം അഡീഷനൽ ചീഫ്​ ജുഡീഷ്യൽ മജിസ്​ട്രേറ്റ്​ (സാമ്പത്തികം) കോടതി ജുഡീഷ്യൽ കസ്​റ്റഡിയിൽ റിമാൻഡ്​ ചെയ്​തു.

മഞ്ചേരി ജയിലിൽവെച്ച്​ തനിക്ക്​ വധഭീഷണി നേരിട്ടതായി അറിയിച്ചതിനെത്തുടർന്ന്​ കാക്കനാട്​ ജയിലിലേക്കാണ്​ അയച്ചത്​. ചെർപ്പുളശ്ശേരി സംഘമാണ് ജയിലിൽ ഭീഷണിപ്പെടുത്തിയത്. ഭീഷണിപ്പെടുത്തിയയാളെ ഫോട്ടോ കണ്ട് ഷെഫീഖ്​ തിരിച്ചറിഞ്ഞതായി കസ്​റ്റംസ്​ അറിയിച്ചു.

അതേസമയം, സുഫിയാ​െൻറ സംഘത്തിനുവേണ്ടി കൊണ്ടുവന്ന സ്വർണം തനിക്ക്​ കൈമാറിയാൽ ടി.പി വധക്കേസ് പ്രതികൾ സംരക്ഷണം നൽകുമെന്ന് അർജുൻ പറഞ്ഞതായും ഷെഫീഖ്​ വെളിപ്പെടുത്തി. ഷാഫിയുടെയും കൊടി സുനിയുടെയും സംരക്ഷണയിൽ സ്വർണം കൊണ്ടുപോകാൻ കഴിയുമെന്നും അർജുൻ പറഞ്ഞിരുന്നു.

എല്ലാ സ്വർണക്കടത്ത് സംഘങ്ങൾക്കും ഒറ്റുകാരുണ്ടായിരു​െന്നന്ന്​ അന്വേഷണത്തിൽ വെളിപ്പെട്ടതായി കസ്​റ്റംസ്​ ബോധിപ്പിച്ചു. ഒറ്റുകാർ നൽകുന്ന വിവരത്തി​െൻറ അടിസ്ഥാനത്തിൽ സംഘങ്ങൾ കുറ്റവാളികളെ വിന്യസിക്കുകയും കാരിയറെ തട്ടിക്കൊണ്ടുപോയി സ്വർണം തട്ടിയെടുക്കുകയുമാണ്​ രീതി. ഇത്തരം തട്ടിക്കൊണ്ടുപോകൽ, ആക്രമണം എന്നിവയുമായി ബന്ധപ്പെട്ട്​ നിരവധി കേസുകൾ പൊലീസ് രജിസ്​റ്റർ ചെയ്തിട്ടുണ്ട്​.

അന്വേഷണവുമായി പ്രതി പൂർണമായി സഹകരിക്കുകയും നിരവധി വെളിപ്പെടുത്തലുകൾ നടത്തുകയും ചെയ്​തിട്ടുണ്ട്​. സ്വർണക്കടത്തിന്​ പിന്നിലെ കൊടുവള്ളി, കോഴിക്കോട്​, കണ്ണൂർ സംഘങ്ങളുടെ പങ്കാളിത്ത​ത്തെക്കുറിച്ചും പറഞ്ഞിട്ടുണ്ട്​. സ്വർണം തട്ടിയെടുക്കാനും ഹവാല ചാനലുകൾ വഴി ഇവ വിൽക്കാനും ഗുണ്ടാസംഘങ്ങൾ സംഘത്തിനകത്ത് പ്രവർത്തിക്കുന്നുണ്ടെന്നും വെളിപ്പെടുത്തിയിട്ടുണ്ട്.

സ്വർണം തട്ടിയെടുക്കാൻ കരിപ്പൂരിലെത്തിയ മൂന്നാമത്തെ സംഘത്തിന്​ നേതൃത്വ​ം നൽകിയതെന്ന്​ സംശയിക്കുന്ന കണ്ണൂർ സ്വദേശി യൂസഫിന്​ ഹാജരാകാൻ കസ്​റ്റംസ്​ നോട്ടീസ്​ നൽകിയിട്ടുണ്ട്​.