​​ക്ഷേത്ര സ്വത്തിന്‍റെ ഉടമ പൂജാരിയല്ല; പ്രതിഷ്​ഠയാണെന്ന്​ സുപ്രീംകോടതി

ന്യൂഡൽഹി: പൂജാരിയെ ക്ഷേത്രസ്വത്തി‍െൻറ ഉടമയായി പരിഗണിക്കാൻ കഴിയില്ലെന്നും പ്രതിഷ്​ഠയാണ്​ അതി‍െൻറ ഉടമയെന്നും സുപ്രീംകോടതി. ക്ഷേത്രത്തി‍െൻറ സ്വത്ത്​ പരിപാലിക്കാനായി കൈവശം വെക്കുക മാത്രമാണ്​ പൂജാരിയുടെ കടമയെന്നും കോടതി വിധിച്ചു. ക്ഷേത്ര സ്വത്തുക്കൾ പൂജാരികൾ വിൽപന നടത്തുന്നതിനെതിരെ കൊണ്ടുവന്ന സർക്കുലർ റദ്ദാക്കിയ ഹൈകോടതി വിധിക്കെതിരെ മധ്യപ്രദേശ്​ സർക്കാർ സമർപ്പിച്ച അപ്പീലിൽ ആണ്​ സുപ്രീംകോടതി വിധി​.

''ക്ഷേത്ര സ്വത്തുമായി ബന്ധപ്പെട്ട ഉടമസ്​ഥാവകാശ രേഖയിൽ, സ്വത്തി‍െൻറ യഥാർഥ അവകാശിയായ പ്രതിഷ്​ഠയുടെ പേരു മാത്രമാണ്​ രേഖപ്പെടുത്തേണ്ടത്​. കൈവശാവകാശവും പ്രതിഷ്​ഠക്കാണ്​. അത്​ നടപ്പിൽ വരുത്തുന്നത്​ പ്രതിഷ്​ഠയുടെ സേവകനിൽ കൂടിയാണ്​. അതുകൊണ്ട്​ ആ സേവക​െൻറ പേര്​ കൈവശാവകാശ രേഖയിൽ ചേർക്കേണ്ടതില്ല'' -ജസ്​റ്റിസ്​ ഹേമന്ദ്​ ഗുപ്​ത, ജസ്​റ്റിസ്​ എ.എസ്​ ബൊപ്പണ്ണ എന്നിവരടങ്ങിയ ബെഞ്ച്​ വിധിച്ചു. പൂജാരി കൈവശക്കാരനോ സർക്കാർ പാട്ടക്കാരനോ അല്ലെന്നും ദേവസ്വത്തിനുവേണ്ടി ആ സ്വത്ത്​ പരിപാലിക്കാൻ ചുമതലപ്പെട്ട ആൾ മാത്രമാണെന്നും കോടതി ചൂണ്ടിക്കാട്ടി. തന്നിലർപ്പിക്കപ്പെട്ട ചുമതല നിർവഹിക്കുന്നതിൽ പൂജാരി പരാജയപ്പെട്ടാൽ ആ സ്​ഥാനത്തുനിന്ന്​ ഒഴിവാ​ക്കപ്പെടുമെന്നും കോടതി കൂട്ടി​ച്ചേർത്തു.

ക്ഷേത്ര സ്വത്തുമായി ബന്ധപ്പെട്ട റവന്യൂ രേഖകളിൽനിന്ന്​ പൂജാരിമാരുടെ പേരുകൾ ഒഴിവാക്കണമെന്ന്​ ആവശ്യപ്പെട്ട്​ സംസ്​ഥാന സർക്കാർ ഇറക്കിയ സർക്കുലറുകൾ ഹൈകോടതി റദ്ദാക്കിയിരുന്നു. ഇതിനെതിരെയാണ്​ സുപ്രീംകോടതിയിൽ അപ്പീൽ നൽകിയത്​.