കിൻഫ്ര ഫിലിം പാർക്ക് ചെയർമാനായി ജോർജുകുട്ടി അ​ഗസ്റ്റി ചുമതലയേറ്റു

തിരുവനന്തപുരം: കിൻഫ്ര ഫിലിം ആൻഡ് വിഡിയോ കോർപ്പറേഷൻ ചെയർമാനായി ജോർജുകുട്ടി അ​ഗസ്റ്റി ചുമതലയേറ്റു. കേരള കോൺ​ഗ്രസ് (എം) സ്റ്റിയറിം​ഗ് കമ്മിറ്റി അം​ഗമാണ്. ഔദ്യോ​ഗികമായി ‌ചുമതലയേൽക്കുന്നതിന്​ മുമ്പ്​ വ്യവസായ മന്ത്രി പി. രാജീവുമായി കൂടിക്കാഴ്ച നടത്തിയിരുന്നു.

കോവിഡ് കാലഘട്ടത്തിൽ വലിയൊരു വെല്ലുവിളിയാണ് ഏറ്റെടുത്തിരിക്കുന്നതെന്നും സംസ്ഥാനത്തെ കിൻഫ്രയുടെ പ്രവർത്തനങ്ങൾ ലോക ശ്രദ്ധയാകർഷിക്കുന്ന തരത്തിൽ നടപ്പാക്കുകയാണ് ലക്ഷ്യമെന്നും ജോർജുകുട്ടി അ​ഗസ്റ്റി പറഞ്ഞു. ആധുനിക കേരളത്തിനായി എൽ.ഡി.എഫ് സർക്കാറിന്‍റെ നൂതന പദ്ധതികൾക്ക് വേദിയൊരുക്കുകയെന്ന കിൻഫ്രയുടെ ദൗത്യം സമയബന്ധിതമായി പൂർത്തിയാക്കുമെന്നും ചെയർമാൻ അറിയിച്ചു. സർക്കാറിന്​ ഇക്കാര്യത്തിൽ വ്യക്തമായ നയമുണ്ടെന്ന് കൂടിക്കാഴ്ചയിൽ മന്ത്രി പി. രാജീവ് പറഞ്ഞു.

സൂരജ് രവീന്ദ്രൻ (മാനേജിങ് ഡയറക്ടർ, കിൻഫ്ര ഫിലിം ആൻഡ് വീഡിയോ പാർക്ക്), കേരള കോൺഗ്രസ് (എം) തിരുവനന്തപുരം ജില്ല പ്രസിഡന്‍റ്​ സഹായ ദാസ് നാടാർ, കർഷക യൂനിയൻ (എം) ജില്ലാ പ്രസിഡന്‍റ്​ സന്തോഷ് യോഹന്നാൻ, ബാബു കണ്ണൂർക്കോണം (കെ.ടി.യു.സി.എം.എ ജില്ല പ്രസിഡന്‍റ്​), വിജയകുമാർ (കഴക്കൂട്ടം നിയോജകമണ്ഡലം പ്രസിഡന്‍റ്​), ജസ്റ്റിൻ (സംസ്ഥാന കമ്മിറ്റി അംഗം), അബേഷ് അലോഷ്യസ്, അലൻ വാണിയപുര, ടോം മനക്കൽ തുടങ്ങിയവർ പങ്കെടുത്തു.