വാട്സ്ആപ്​ വഴി കഞ്ചാവ്​ വിൽപന; കുറ്റിപ്പുറത്ത് മൂന്നുപേർ പിടിയിൽ

കുറ്റിപ്പുറം: വാട്സ്ആപ്​ ഗ്രൂപ് വഴി കഞ്ചാവ് ​വിൽപന നടത്തുന്ന മൂന്നുപേരെ കുറ്റിപ്പുറത്ത്​ എക്സൈസ് സംഘം പിടികൂടി. കോട്ടക്കൽ, പുത്തനത്താണി, രണ്ടത്താണി മേഖലകളിൽ ആന്ധ്രയിൽനിന്ന്​ കഞ്ചാവ് എത്തിക്കുന്ന രണ്ടത്താണി സ്വദേശി അപ്പക്കാട്ടിൽ ഫൈസൽ (24), ആതവനാട് പറമ്പൻ വീട്ടിൽ റഷീദ് (47), അനന്താവൂർ ചിറ്റകത്ത് മുസ്തഫ (42) എന്നിവരാണ്​ 4.5 കിലോ കഞ്ചാവുമായി പിടിയിലായത്.

ആവശ്യക്കാരെന്ന വ്യാജേനയെത്തിയ ഉദ്യോഗസ്​ഥരെ തിരിച്ചറിഞ്ഞ​ നാലംഗസംഘം രക്ഷപ്പെടാൻ ശ്രമിച്ചെങ്കിലും മൂന്നുപേരെ പിടികൂടുകയായിരുന്നു. 4.5 കിലോ കഞ്ചാവും 17,000 രൂപയും മൂന്നു​ മൊബൈൽ ഫോണുകളും പിടിച്ചെടുത്തു. ബൈക്കും കസ്​റ്റഡിയിലെടുത്തു. സംഘത്തിലെ പ്രധാനി പൂവൻചിന സ്വദേശി പെൽപ്പത്ത് വീട്ടിൽ സക്കീബ്​ (24) ഓടിരക്ഷപ്പെട്ടു.

കോട്ടക്കൽ കേന്ദ്രീകരിച്ച് ജില്ലയിലേക്ക് ട്രെയിൻ മാർഗം കഞ്ചാവെത്തിക്കാൻ ഇരുപതോളം യുവാക്കൾ സക്കീബിന് കീഴിലുണ്ട്. ഇയാൾ അഡ്മിനായ ‘ഫുൾ ഓൺ ഫുൾ പവർ’ എന്ന വാട്സ്ആപ്​ ഗ്രൂപ് എക്സൈസി​​​െൻറ നിരീക്ഷണത്തിലായിരുന്നു. ഗ്രൂപ്പിൽനിന്ന്​ സംഘത്തെക്കുറിച്ച് നിർണായക വിവരങ്ങൾ ലഭിച്ചിരുന്നു. വിൽപനക്കാർക്കിടയിൽ ‘ഡോൺ’ എന്ന ഇടനിലക്കാരൻ വഴി കിലോക്കണക്കിന് കഞ്ചാവ് ജില്ലയിലേക്ക് ഒഴുകുന്നുണ്ട്.

പിടിയിലായ റഷീദ്​ സ്ത്രീപീഡനമുൾ​െപ്പടെ നിരവധി കേസുകളിൽ പ്രതിയാണ്. മാസങ്ങൾക്ക് മുമ്പ് റെയിൽവേ സ്​റ്റേഷൻ പരിസരത്ത് കഞ്ചാവ് കൈമാറ്റത്തിനിടെ എക്സൈസ് സംഘത്തെ കണ്ട് ഇയാൾ ഓടിരക്ഷപ്പെട്ടിരുന്നു. നിരവധി ക്രിമിനൽ കേസുകളിൽ പ്രതിയാണ് ഫൈസൽ. സക്കീബിനെ ഉടൻ പിടികൂടുമെന്ന്​ എക്സൈസ് ഇൻസ്പെക്ടർ ജിജി പോൾ അറിയിച്ചു.

ആറു മാസത്തിനകം കുറ്റിപ്പുറം എക്സൈസ് സംഘം മേഖലയിൽനിന്ന് പിടികൂടിയത്​ 50 കിലോ കഞ്ചാവാണ്​. പ്രിവൻറിവ് ഓഫിസർമാരായ ജാഫർ, ലതീഷ്, ഷിജുമോൻ, സിവിൽ എക്സൈസ് ഉദ്യോഗസ്ഥരായ ഷിബു ശങ്കർ, ഹംസ, വിഷ്ണുദാസ്, രാജീവ് കുമാർ, മിനുരാജ്, എ.വി. കണ്ണൻ, ദിവ്യ, രജിത, ഡ്രൈവർ ശിവകുമാർ എന്നിവർ അന്വേഷണ സംഘത്തിലുണ്ടായിരുന്നു.