സി.പി.എം ജില്ല സമ്മേളനത്തിൽനിന്ന്​ വിട്ടുനിന്ന്​ ജി. സുധാകരൻ

ആലപ്പുഴ: സി.പി.എം ആലപ്പുഴ ജില്ല സമ്മേളനത്തിൽനിന്ന്​ വിട്ടുനിന്ന്​ മുതിർന്ന നേതാവ്​ ജി. സുധാകരൻ. കഴിഞ്ഞ സമ്മേളനത്തിൽവരെ സജീവമായിരുന്ന സുധാകരൻ ഇത്തവണ ചിത്രത്തിലില്ല​. ബ്രാഞ്ച്​ അംഗമായി തരംതാഴ്ത്ത​െപ്പട്ട അദ്ദേഹം ജില്ല സമ്മേളന പ്രതിനിധിയല്ല. ഉദ്​ഘാടന സമ്മേളനത്തിൽ പ​ങ്കെടുക്കാമായിരുന്നെങ്കിലും അതിന്​ അദ്ദേഹം എത്തിയതുമില്ല.

തന്‍റെ തട്ടകമായിരുന്ന അമ്പലപ്പുഴ മണ്ഡലത്തിൽ കഴിഞ്ഞ നിയമസഭാ തെരഞ്ഞെടുപ്പിൽ സി.പി.എമ്മിൽനിന്ന്​ എച്ച്​. സലാം ആണ്​ വിജയിച്ചത്​. മൂന്നുതവണ മത്സരിച്ചവർക്ക്​ വീണ്ടും സീറ്റ്​ നൽകേണ്ടെന്ന മാനദണ്ഡമനുസരിച്ചാണ്​ സുധാകരനെ തഴഞ്ഞത്​. സലാം വിജയിച്ചെങ്കിലും​ സുധാകരന്​ ലഭിച്ചത്ര ഭൂരിപക്ഷമില്ലാതിരുന്നത്​ ചർച്ചയായിരുന്നു. അത്​ അന്വേഷിക്കാൻ പാർട്ടി നിയോഗിച്ച എളമരം കരീം അധ്യക്ഷനായ സമിതിയുടെ റിപ്പോർട്ട്​ അനുസരിച്ചാണ്​ സുധാകരനെ ബ്രാഞ്ചിലേക്ക്​ തരംതാഴ്ത്തിയത്​.

മൂന്നുദിവസത്തെ ജില്ല സമ്മേളനത്തിൽ മുഖ്യമന്ത്രി പിണറായി വിജയനും സംസ്ഥാന സെക്രട്ടറി എം.വി. ഗോവിന്ദനും ആദ്യന്തം പ​ങ്കെടുക്കുന്നുണ്ട്​. അവർ സുധാകരനെ ക്ഷണിക്കുമോ, കൂടിക്കാഴ്ചക്ക്​ മുതിരുമോ, അവസാന ദിവസം പൊതുസമ്മേളനത്തിലെങ്കിലും എത്തുമോ എന്നീ കാര്യങ്ങൾ കണ്ടറി​യേണ്ടതാണ്​. അമ്പലപ്പുഴ ഏരിയ സമ്മേളനം നടന്നത്​ സുധാകരന്‍റെ വസതിക്ക്​ സമീപമായിരുന്നു. എന്നിട്ടും സമാപന സമ്മേളനത്തിൽപോലും പ​ങ്കെടുപ്പിച്ചിരുന്നില്ല. സുധാകരനെ എച്ച്​. സലാം ഒതുക്കുന്നു എന്ന പ്രചാരണം ശക്തമാണ്​.