സൗജന്യ ഭക്ഷ്യകിറ്റ്​ നാലു മാസത്തേക്ക്​ കൂടി -മുഖ്യമ​ന്ത്രി

തിരുവനന്തപുരം: സംസ്​ഥാനത്തെ എല്ലാ റേഷൻ കാർഡ്​ ഉടമകൾക്കും ഡിസംബർ വരെ സൗജന്യ ഭക്ഷ്യകിറ്റ്​ വിതരണം ചെയ്യുമെന്ന്​ മുഖ്യമന്ത്രി പിണറായി വിജയൻ. കോവിഡ്​ മൂലം ദുരിതം അനുഭവിക്കുന്ന ജനങ്ങളെ സഹായിക്കാൻ നാലുമാസം കൂടി ഭക്ഷ്യകിറ്റുകൾ സൗജന്യമായി വിതരണം ചെയ്യുമെന്ന്​ സർക്കാറി​െൻറ നൂറുദിന കർമപരിപാടിയിൽ പ്രഖ്യാപിച്ചിരുന്നു. വ്യാഴാഴ്​ച സൗജന്യ ഭക്ഷ്യകിറ്റ്​ വിതരണം ആരംഭിക്കാൻ കഴിഞ്ഞെന്നും മുഖ്യമന്ത്രി വാർത്തസമ്മേളനത്തിൽ അറിയിച്ചു.

88,42,000 കുടുംബങ്ങൾക്കാണ്​ ​സൗജന്യ റേഷൻ ലഭിക്കുക. കോവിഡ്​ കാലത്ത്​ ആരും പട്ടിണി കിടക്കരുതെന്ന സർക്കാർ തീരുമാനത്തി​െൻറ തുടർച്ചായാണ്​ ഇതെന്നും മുഖ്യമന്ത്രി കൂട്ടിച്ചേർത്തു.

കടല, പഞ്ചസാര, ആട്ട, വെളിച്ചെണ്ണ എന്നിവ ഉൾപ്പെടെ എട്ടു അവശ്യവസ്​തുക്കളാണ്​ സപ്ലൈ​േകായുടെ ഭക്ഷ്യകിറ്റിലുണ്ടാകുക. ​​റേഷൻ കടകളിലൂടെ പതിവുപോലെ സൗജന്യ നിരക്കിലെ റേഷനും വിതരണം ചെയ്യും. ഓണത്തിന്​ 88ലക്ഷം റേഷൻ കാർഡ്​ ഉടമകൾക്കും വിദ്യാർഥികൾക്കും മത്സ്യത്തൊഴിലാളികൾക്കും പട്ടിക വർഗ കുടുംബങ്ങൾക്കും സൗജന്യ ഭക്ഷ്യകിറ്റ്​ വിതരണം ചെയ്​തിരുന്നു. കോവിഡ്​ പ്രതിസന്ധി തുടരുന്ന സാഹചര്യത്തിലാണ്​ നാലു​മാസത്തേക്ക്​ കൂടി ഭക്ഷ്യകിറ്റ്​ വിതരണം ചെയ്യുന്നതെന്നും മുഖ്യമന്ത്രി പറഞ്ഞു.