കുട്ടികളുടെ ജീവൻ കൊണ്ട്​ കളിക്കുന്ന ഫ്രീ ഫയർ

പബ്​ജിക്ക്​ പിന്നാലെ കുട്ടികളുടെ ജീവൻ കൊണ്ടു കളിക്കുകയാണ്​​ ഫ്രീ ഫയർ ഓൺലൈൻ ഗെയിം. 2017ൽ ഇറങ്ങിയെങ്കിലും പബ്​ജിയുടെ നി​രോധനത്തോടെയാണ് പ്രചാരം നേടിയത്​​. ലോക്​ഡൗണിലെ അടച്ചിരിപ്പും ഫോണിലെ ഓൺലൈൻ ക്ലാസുകളുമാണ്​ വില്ലനായത്​. മാതാപിതാക്കളുടെ സാ​ങ്കേതിക പരിജ്​ഞാനത്തിലെ കുറവും കുട്ടികൾക്ക്​ അനുഗ്രഹമായി. 50 കോടിയിലധികം പേരാണ്​ ഫ്രീ ഫയർ ആൻഡ്രോയിഡ്​ പതിപ്പ്​ ഡൗൺലോഡ്​ ചെയ്​തിട്ടുള്ളത്​.

പബ്​ജി 1.6 ജി.ബി ഫോൺ മെമ്മറി കവർന്നിരുന്നെങ്കിൽ ഫ്രീ ഫയറിന്​ 716 എം.ബി മതി. ഫ്രീ ഫയർ രണ്ട്​ ജി.ബി റാമുള്ള പഴയ ആൻഡ്രോയിഡ്​ 4.0 (ഐസ്​ക്രീം സാൻവിച്ച്​) പതിപ്പുള്ള കുറഞ്ഞ ഫോണുകളിലും നന്നായി പ്രവർത്തിക്കും. ഇതാണ്​ പ്രധാന ആകർഷണം.

ബാറ്റിൽ റോയൽ

കോഷുൻ തകാമിയുടെ 1999 ലെ നോവൽ ബാറ്റിൽ റോയൽ അടിസ്​ഥാനമാക്കി അതേ​പേരിൽ 2000ൽ ഇറങ്ങിയ ജപ്പാൻ സിനിമ ആണ്​ ഗെയിമുകളുടെ പ്രചോദനം​. ഒമ്പതാം ക്ലാസ്​ വിദ്യാർഥികളായ 42 പേരെ വിജന ദ്വീപിലേക്ക് അയക്കുന്നു. മാപ്പ്, ഭക്ഷണം, ആയുധങ്ങൾ എന്നിവ നൽകുന്നു. കഴുത്തിൽ കോളർ ബോംബുമുണ്ട്​. നിയമം ലംഘിച്ചാൽ, കോളർ പൊട്ടിത്തെറിക്കും. ദൗത്യം പരസ്പരം കൊല്ലുക, അവസാന വിജയിയാവുക. അവസാന വിജയിക്ക്​ ദ്വീപ് വിടാം. ഒന്നിൽ കൂടുതൽ വിജയികൾ ഉണ്ടെങ്കിൽ കോളറുകൾ പൊട്ടിത്തെറിക്കുകയും എല്ലാവരെയും കൊല്ലുകയും ചെയ്യുന്നതാണ്​ സാങ്കൽപിക കഥ.

പബ്​ജി പോലെ ബാറ്റിൽ റോയൽ വിഭാഗത്തിൽപെടുന്നതാണ്​ ഫ്രീ ഫയറും. അതായത്​ മറ്റുള്ള കളിക്കാരെ കൊന്നുതള്ളി വിജയിക്കുക. ഒരു വിമാനത്തിൽ ദ്വീപിന്​ മുകളിൽ 50 കളിക്കാരെ ഇറക്കിവിടും. ഇറങ്ങുന്ന സമയം മുതൽ കളിക്കാരെ നിയന്ത്രിക്കാം. പാരച്യൂട്ടിൽ എവിടെയിറങ്ങണമെന്ന്​ തീരുമാനിക്കാം. അവിടെയിറങ്ങി ഉള്ള ആയുധമെടുത്ത്​ മറ്റ്​ 49 കളിക്കാരെ കൊന്നുതള്ളി അന്തിമ വിജയിയാവുക. അതിന്​ പല ഘട്ടങ്ങളിലായി ആയുധം വാങ്ങാൻ പണം വേണം.

ഈ പണം കുട്ടികൾ ക​ണ്ടെത്തുന്നത്​ മാതാപിതാക്കളുടെയോ മറ്റുള്ളവരുടെയോ അക്കൗണ്ടിൽനിന്നാണ്​. മൂന്ന്​ മുതൽ അഞ്ചുപേരുള്ള സംഘമായും കളിക്കാം. പണമില്ലാതെ ആയുധങ്ങളുടെ പോരായ്​മകൊണ്ട്​ തോൽക്കുന്നത്​ കൂടാതെ മറ്റ്​ കളിക്കാരുടെ കളിയാക്കലും സഹിക്കാനാവാതെ ആത്​മഹത്യയിൽ അഭയം തേടുകയാണ്​ പലരും.

പബ്​ജി വേഷംമാറി വീണ്ടും

സ്വകാര്യതലംഘനത്തി‍െൻറ പേരിൽ 2020 സെപ്​റ്റംബറിലാണ്​ ചൈനീസ്​ കമ്പനി ടെൻസെൻറി‍െൻറ പബ്​ജി മൊബൈൽ (പ്ലേയേഴ്​സ്​ അൺനോൺ ബാറ്റിൽ ഗ്രൗണ്ട്​സ്​) നിരോധിച്ചത്​. ഇപ്പോൾ ദക്ഷിണ കൊറിയൻ കമ്പനി ക്രാഫ്​റ്റൺ ബാറ്റിൽഗ്രൗണ്ട്​ മൊബൈൽ ഇന്ത്യ എന്ന പേരിൽ പബ്​ജിയെ വീണ്ടും രാജ്യത്തെത്തിച്ചിട്ടുണ്ട്​​. ഒരു കോടിയിലധികം പേർ ആൻഡ്രോയിഡ്​ പതിപ്പ്​ ഡൗൺലോഡും ചെയ്​തു. ഐഫോണുകളിലേക്ക്​ വരാൻ കാത്തിരിക്കുകയാണ്​ ഗെയിം. ഇന്ത്യൻ കുട്ടികൾക്കുമാത്രമായി സൃഷ്​ടിച്ചതാണത്രേ ബാറ്റിൽഗ്രൗണ്ട്​ മൊബൈൽ ഇന്ത്യ.

കണ്ണുവേണം കുട്ടികളിൽ

കുട്ടികൾ പഠിക്കു​േമ്പാൾ എപ്പോഴും ഒരു കണ്ണ്​ അവരുടെ മേൽ വേണം. ഒപ്പം ആരെങ്കിലും ഉള്ളത്​ നല്ലതാണ്​. മുറിയടച്ചിരുന്നും വീട്ടിൽ ആരുമില്ലാത്ത​പ്പോഴും ഫോണുമായി കളിക്കാൻ അനുവദിക്കരുത്​.

കുട്ടികളുടെ അയൽപക്കത്തെയും സമൂഹമാധ്യമങ്ങളിലെയും സൗഹൃദങ്ങൾ അറിയണം. സ്​നേഹത്തോടെയിടപെട്ട്​ മക്കളുടെ സുഹൃത്താവുക. ഓൺലൈൻ ക്ലാസിന്​ സ്​മാർട്ട്​ഫോൺ വാങ്ങി നൽകാതെ ടി.വിയിലോ, ലാപ്​ടോപിലോ ക്ലാസ്​ കാണാനുള്ള സൗകര്യം ഏർപ്പെടുത്തുക.