ഫാ. സ്റ്റാൻ സ്വാമിയുടെ മരണം: മനുഷ്യാവകാശ പ്രവർത്തകരോടുള്ള നിഷ്​ഠൂര നടപടികൾ അപലപനീയം -ബിഷപ് ഡോ. അലക്സ് വടക്കുംതല

കണ്ണൂർ: ആദിവാസികളുടെ വിമോചനത്തിനും ക്ഷേമത്തിനുമായി ജീവിതം സമർപ്പിച്ച ഫാ. സ്റ്റാൻ ലൂർദ്​ സ്വാമിയുടെ നിര്യാണ വാർത്ത ഹൃദയ നൊമ്പരത്തോടു കൂടെയാണ് ശ്രവിച്ചതെന്ന്​ കണ്ണൂർ ബിഷപ് ഡോ. അലക്സ് വടക്കുംതല. മനുഷ്യാവകാശ പ്രവർത്തകരോടുള്ള നിഷഠൂര നടപടികളെ അപലപിക്കുന്നു. നന്മയും നീതിയുമുള്ള സമൂഹത്തിനേ വളർച്ചയും പുരോഗതിയുമുള്ളൂവെന്നും ബിഷപ്​ കൂട്ടിച്ചേർത്തു.

'2008 മുതൽ 2011 വരെ റാഞ്ചിയിൽ പ്രവർത്തിക്കുന്ന കാലം മുതൽ സ്റ്റാൻ സ്വാമിയെ വ്യക്തിപരമായി അടുത്ത് അറിയാമായിരുന്നു. ജനനന്മ മാത്രം കാംഷിച്ച്​ സർവസംഗപരിത്യാഗിയായി ജീവിച്ച ജെസ്യൂട്ട്‌ വൈദികനായിരുന്നു അദ്ദേഹം. കഴിഞ്ഞ വർഷം റാഞ്ചിയിൽ നിന്നും അറസ്റ്റ് ചെയ്യപ്പെട്ടു ജയിലിലായ ആ എൺപത്തിനാലുകാരൻ ഇത്രയും നാൾ നീതിക്കായി കാത്തിരുന്നു. ഇന്ന് നീതിക്കായി നിത്യതയിലേക്കു യാത്രയായി'' -ബിഷപ് അലക്സ് വടക്കുംതല അനുസ്മരിച്ചു.