തമിഴ്​നാട്ടിലെ മുൻ മന്ത്രി കേരളത്തിൽ നിന്ന്​ സ്വർണം വാങ്ങിയതിന്​ രണ്ടര കോടി കമീഷൻ; അങ്ങനെയെങ്കിൽ ഇടപാട്​ എത്ര രൂപക്കായിരിക്കുമെന്ന്​ ഇ.ഡി

തമിഴ്നാട്ടിലെ മുൻ ആരോഗ്യമന്ത്രിയും സിറ്റിങ് എം.എൽ.എയുമായ ഡോ. വിജയ ഭാസ്കറിനെ കൊച്ചിയിൽ എൻഫോഴ്സ്മെന്‍റ്​ ചോദ്യം ചെയ്യുന്നു. കേരളത്തിലെ പ്രമുഖ ജ്വല്ലറി ഉടമ പൊലീസിൽ നൽകിയ പരാതിയുടെ തുടർനടപടിയായാണ്​ ഇ.ഡിയുടെ ചോദ്യം ചെയ്യൽ. എം.ഐ.ഡി.എം.കെയുടെ എം.എൽ.എയും മുൻ സർക്കാറുകളിൽ ആരോഗ്യ മന്ത്രിയുമായിരുന്ന വിജയ ഭാസ്കറിനെതിരെ അനധികൃത സ്വത്ത് സമ്പാദനത്തിന് നേരത്തെ വിജിലൻസ് കേസുണ്ട്.

ഷർമിള എന്ന യുവതിക്കെതിരെ അങ്കമാലിയിലെ ഒരു ജ്വല്ലറി ഉടമ പൊലീസിൽ പരാതി നൽകിയിരുന്നു. ജ്വല്ലറിയിൽ നിന്ന്​ രണ്ടര കോടിയുടെ സ്വർണം വാങ്ങിയ ശേഷം പണം തരാതെ വഞ്ചിച്ചുവെന്നായിരുന്നു ജ്വല്ലറി ഉടമ നൽകിയ പരാതി. എന്നാൽ, വൻകിട ഇടപാടുകാരെ ജ്വല്ലറിക്ക്​ പരിചയപ്പെടുത്തി കൊടുത്തയാളാണ്​ താനെന്നായിരുന്നു ഷർമിള പൊലീസിനോട്​ പറഞ്ഞത്​. വിജയഭാസ്​കറിനെ ഇങ്ങിനെ ജ്വല്ലറിക്ക്​ പരിചയ​പ്പെടുത്തി​യിട്ടുണ്ട്​. വിജയ ഭാസ്​കർ വാങ്ങിയ സ്വർണത്തിന്‍റെ കമീഷനായാണ്​ രണ്ടര കോടിയുടെ സ്വർണം ജ്വല്ലറിയിൽ നിന്ന്​ സ്വീകരിച്ചതെന്നായിരുന്നു ഇവർ പറഞ്ഞത്​.

രണ്ടര കോടി കമീഷനായി ആവശ്യപ്പെടണമെങ്കിൽ എത്ര രൂപയുടെ സ്വർണം വിജയ ഭാസ്​കർ വാങ്ങിയിട്ടുണ്ടാകുമെന്ന സംശയം കാരണമാണ്​ പൊലീസ്​ വിവരം ഇ.ഡിക്ക്​ കൈമാറുന്നതും ഇ.ഡി അന്വേഷണം തുടങ്ങുന്നതും.