മുൻ മന്ത്രി എം.കമലം അന്തരിച്ചു

കോഴിക്കോട്​: മുൻ മന്ത്രിയും മുതിർന്ന കോൺഗ്രസ്​ നേതാവുമായ എം.കമലം(96) അന്തരിച്ചു. കോഴിക്കോട്​ നടക്കാവിലെ വ സതിയിലായിരുന്നു അന്ത്യം. കുറച്ചുകാലമായി രോഗബാധിതയായിരുന്നു. എം.കമലത്തി​​െൻറ നിര്യാണത്തെ തുടർന്ന്​ കോഴിക് കോട്​ നടത്താനിരുന്ന മനുഷ്യഭൂപടം പരിപാടി മാറ്റിയതായി കെ.പി.സി.സി അറിയിച്ചു. ജില്ലയിൽ മൂന്ന്​ ദിവസത്തെ ദുഃഖാചരണവും പ്രഖ്യാപിച്ചിട്ടുണ്ട്​.

കോൺഗ്രസി​​െൻറ ചരിത്രത്തിലെ പ്രമുഖ വനിത നേതാക്കളിലൊരാളായിരുന്നു കമലം. 1982-87 കാലഘട്ടത്തിൽ കരുണാകരൻ മന്ത്രിസഭയിലാണ്​ അവർ സഹകരണമന്ത്രി സ്ഥാനം വഹിച്ചത്​. വനിതാ കമ്മീഷണൻ ചെയ്​ർപേഴ്​സൻ, കെ.പി.സി.സി വൈസ്​ പ്രസിഡൻറ്​, ജനറൽസെക്രട്ടറി, എ.ഐ.സി.സി അംഗം തുടങ്ങിയ പദവികൾ വഹിച്ചിട്ടുണ്ട്​. ഇന്ദിരാഗാന്ധിയുമായി അടുത്ത ബന്ധം നില നിർത്തിയ നേതാവായിരുന്നു.

1946ൽ കോഴിക്കോട്​ നഗരസഭയിലെ വനിത സംവരണ വാർഡിൽ നിന്ന്​ മൽസരിച്ചാണ്​ കമലം രാഷ്​ട്രീയരംഗത്തേക്ക്​ പ്രവേശിക്കുന്നത്​. 1954ൽ കണ്ണൂർ കേന്ദ്രമായി 200 മഹിളാ സഹകരണസംഘങ്ങളും സമിതികളും രൂപവൽക്കരിച്ചത്​ അവരുടെ ശ്രദ്ധേയ പ്രവർത്തനമാണ്​. 1958ൽ കണ്ണൂരിൽ കെ.പി.സി.സി സമ്മേളനത്തിൽ 20000ത്തിലേറെ സ്​ത്രീകളെ പ​ങ്കെടുപ്പിച്ചതോടെ ഇന്ദിരാഗാന്ധിയുടെ മനസ്സിലും കമലം ഇടംനേടി.

1975ൽ അടിയന്തരാവസ്ഥക്കെതിരെ സമരം ചെയ്​ത്​ അവർ ജയിൽവാസമനുഷ്​ഠിച്ചു. അടിയന്തരാവസ്ഥക്ക്​ ശേഷം സംഘടന കോൺഗ്രസിൽ നിലയുറപ്പിച്ചു. പിന്നീട്​ സംഘടനാ കോൺഗ്രസ്​ ജനതപാർട്ടിയായി മാറി. ജനതാപാർട്ടി സ്ഥാനാർഥിയായി 1980ൽ നിയമസഭയിലേക്ക്​ കോഴിക്കോട്ട്​ നിന്ന്​ മൽസരിച്ചെങ്കിലും പരാജയപ്പെട്ടു. പിന്നീട്​ 1982ൽ കൽപ്പറ്റയിൽ നിന്നാണ്​ അവർ നിയമസഭയിലെത്തുന്നത്​.