എസ്​.എസ്​.എൽ.സി വിജയം: ഗോപാലേട്ടന്‍റെ പശുവും ആമിനത്താത്തയുടെ പൂവൻ കോഴിയുമില്ല, ഇജ്ജാതി ട്രോളുകളൊന്നുമില്ല -മുൻ വിദ്യാഭ്യാസ മന്ത്രി അബ്​ദുറബ്ബ്​

മലപ്പുറം: എസ്​.എസ്​.എൽ.സി പരീക്ഷ എഴുതിയ 99.47 ശതമാനം വിദ്യാർഥികളും വിജയിച്ച പശ്​ചാത്തലത്തിൽ മുൻ വിദ്യാഭ്യാസമന്ത്രി പി.കെ. അബ്​ദുറബ്ബിന്‍റെ കുറിപ്പ്​ വൈറലാവുന്നു. അദ്ദേഹം മന്ത്രിയായിരിക്കേ 2014 ൽ 95.47 ശതമാനം പേർ വിജയിച്ചതിന്​ ഇടതുപക്ഷ സംഘടനകൾ അബ്​ദുറബ്ബിനെ കണക്കറ്റ്​ പരിഹസിച്ചിരുന്നു. ''സ്​കൂളിന്‍റെ ഓടുമാറ്റാൻ വന്ന ബംഗാളിക്കും ഫുൾ എപ്ലസ്​, മഴയത്ത്​ സ്​കൂളിൽ കയറിയ ഗോപാലേട്ടന്‍റെ പശുവിനും വിജയം...'' തുടങ്ങിയ ട്രോളുകൾ അന്ന്​ വ്യാപകമായി പരിഹസിച്ചിരുന്നു. ഇതിനൊക്കെ അക്കമിട്ട്​ മറുപടി പറയുകയാണ്​ അബ്ദുറബ്ബ്​.

''ഗോപാലേട്ടൻ്റെ പശുവില്ല, ആമിനത്താത്തയുടെ പൂവൻ കോഴിയില്ല, സ്കൂളിൻ്റെ ഓട് മാറ്റാൻ വന്ന ബംഗാളിയുമില്ല. റിസൾട്ട് പ്രഖ്യാപിച്ചത് ഞാനല്ലാത്തത് കൊണ്ട് ഇജ്ജാതി ട്രോളുകളൊന്നുമില്ല'' -എന്നു തുടങ്ങുന്ന കുറിപ്പിൽ സംസ്​ഥാനത്തെ വിജയശതമാനത്തിലെ ക്രമാനുഗത വളർച്ച കണക്കുകൾ സഹിതം വിശദീകരിക്കുന്നുണ്ട്​.​ 'വിജയശതമാനം കൂടിയത് മന്ത്രിയുടെ കഴിവു കേടല്ല. വിദ്യാർത്ഥികളേ, നിങ്ങളുടെ മിടുക്കു കൊണ്ടാണ്. നിങ്ങളുടെ വിജയത്തെ വില കുറച്ചു കാണുന്നില്ല. ഉപരിപഠന യോഗ്യത നേടിയ എല്ലാ വിദ്യാർത്ഥികൾക്കും അഭിനന്ദനങ്ങൾ'' എന്നുപറഞ്ഞാണ്​ കുറിപ്പ്​ അവസാനിക്കുന്നത്​.

ഫേസ്​ബുക്​ പോസ്റ്റിന്‍റെ പൂർണരൂപം:

SSLC വിജയശതമാനം 99.47.

ഗോപാലേട്ടന്‍റെ പശുവില്ല,

ആമിനത്താത്തയുടെ പൂവൻ കോഴിയില്ല,

സ്കൂളിൻ്റെ ഓട് മാറ്റാൻ വന്ന ബംഗാളിയുമില്ല.

റിസൾട്ട് പ്രഖ്യാപിച്ചത് ഞാനല്ലാത്തത് കൊണ്ട്

ഇജ്ജാതി ട്രോളുകളൊന്നുമില്ല.

2011 ൽ എം.എ.ബേബി വിദ്യാഭ്യാസ മന്ത്രിയായ സമയത്ത് 91.37 ആയിരുന്നു വിജയശതമാനം. പിന്നീട് ഞാൻ മന്ത്രിയായിരുന്ന കാലത്തും SSLC

വിജയശതമാനം കൂടിക്കൂടി വന്നു.

2012 ൽ 93.64%

2013 ൽ 94.17%

2014 ൽ 95.47 %

2015 ൽ 97.99%

2016 ൽ 96.59%

UDF ന്‍റെ കാലത്താണെങ്കിൽ വിജയശതമാനം ഉയരുമ്പോൾ വിദ്യാർത്ഥികളുടെ കഴിവിനെ

വില കുറച്ചു കാണിക്കുക, മന്ത്രിയെ ട്രോളുക, കുറ്റപ്പെടുത്തുക.. ഇതൊക്കെയാണ് ഇടത് സൈബർ പോരാളികളുടെ സ്ഥിരം പണി.

2016 മുതൽ പ്രഫസർ രവീന്ദ്രനാഥ് മന്ത്രിയായ ശേഷമുള്ള വിജയശതമാനവും ഉയരത്തിൽ തന്നെയായിരുന്നു.

2017 ൽ 95.98%

2018 ൽ 97.84%

2019 ൽ 98.11%

2020 ൽ 98.82%

ഇപ്പോഴിതാ 2021 ൽ 99.47% പേരും SSLC ക്ക് ഉപരിപഠന യോഗ്യത നേടിയിരിക്കുന്നു.

വിജയശതമാനം കൂടിയത് മന്ത്രിയുടെ കഴിവു കേടല്ല, വിദ്യാർത്ഥികളേ നിങ്ങളുടെ മിടുക്കു കൊണ്ടാണ്. നിങ്ങളുടെ വിജയത്തെ വില കുറച്ചു കാണുന്നില്ല.

ഉപരിപഠന യോഗ്യത നേടിയ എല്ലാ വിദ്യാർത്ഥികൾക്കും അഭിനന്ദനങ്ങൾ.