കൂട്ടിലടച്ച കടുവയെ കണ്ടത്​ പാറപ്പുറത്ത്​; ഭയപ്പെട്ട നിമിഷങ്ങൾ പങ്കു​െവച്ച്​ വനപാലകർ

കാട്ടാക്കട: ആശങ്കക്ക്​ വിരാമമിട്ട്​ ഒടുവിൽ കടുവയെ കീഴടക്കിയെങ്കിലും സിംഹ സഫാരി പാർക്കിൽ ശനിയാഴ്​ചയുണ്ടായ അനുഭവം നടുക്കം മാറാതെ പങ്കു​െവക്കുകയാണ്​ വനപാലകർ.

പാര്‍ക്കിലെ ഇരുമ്പഴിക്കുള്ളില്‍ പാര്‍പ്പിച്ചിരിക്കുന്ന കടുവയുടെ ആരോഗ്യ സ്ഥി​തി വിലയിരുത്താനാണ്​ വനപാലകസംഘം ശനിയാഴ്ച ഉച്ചയോടെ പാര്‍ക്കിനുള്ളിൽ വന്നത്​.

വെറ്ററിനറി ഡോക്ടര്‍ ഷിജു, നെയ്യാര്‍ഡാം വന്യജീവിസങ്കേതത്തിലെ വനപാലകരായ സുനില്‍, ദിവ്യ ജാസ്മിന്‍, ദിവ്യ നായര്‍, രേവതി എന്നിവരായിരുന്നു സംഘത്തിൽ.

നെയ്യാര്‍ഡാം വന്യജീവിസങ്കേത നിന്ന്​ നെയ്യാറിലൂടെ ബോട്ടില്‍ മരക്കുന്നത്ത് എത്തുകയായിരുന്നു. അവിടെ നിന്ന്​ പാര്‍ക്കില്‍കയറി കൂടിനടുത്തേക്ക്​ നടക്ക​ുന്നതിനിടെയാണ്​ കടുവ പാറപുറത്ത് നില്‍ക്കുന്നത് കണ്ടത്. കൂട്ടിലടച്ച കടുവയെ പാര്‍ക്കില്‍ കണ്ടതോടെ വനപാലകര്‍ ഭയന്നുവിറച്ചു.

ഏറെ പണിപ്പെട്ട് വളരെ സാഹസികമായാണ് സംഘം പാര്‍ക്കില്‍നിന്ന്​ സുരക്ഷിതമായി പുറത്തിറങ്ങിയത്​. കടു​വയുടെ ആക്രമണം ഉണ്ടാകാൻ സാധ്യതയുള്ളതിനാൽ ശബ്​ദമുണ്ടാക്കാതെ വേഗത്തിൽ നടന്ന്​ ബോട്ടില്‍ കയറുകയായിരുന്നു. വിവരം ഉന്നത വനപാലകരെ അറിയിക്കുകയും അവർ തുടർനടപടി സ്വീകരിക്കുകയുമായിരുന്നു.