വിദേശവനിതയുടെ കൊലപാതകം; കുറ്റപത്രം സമര്‍പ്പിച്ചു

തിരുവനന്തപുരം: കോവളത്ത് വിദേശവനിതയെ ബലാത്സംഗം ചെയ്ത് കൊന്ന സംഭവത്തില്‍ പൊലീസ് കുറ്റപത്രം സമര്‍പ്പിച്ചു. നെയ്യാറ്റിന്‍കര മജിസ്‌ട്രേറ്റ് കോടതി രണ്ടിലാണ് 77 പേജുള്ള കുറ്റപത്രം ഫോർട്ട്​ അസി. കമീഷണർ ദിനിൽ സമര്‍പ്പിച്ചത്. മയക്കുമരുന്ന് കൊടുത്ത് വിദേശവനിതയായ ലിഗയെ ബലാത്സംഗം ചെയ്തശേഷം രണ്ടുപേർ ചേര്‍ന്ന് കൊലപ്പെടുത്തിയെന്നാണ് കുറ്റപത്രം​. കഴിഞ്ഞ ഏപ്രില്‍ 20നാണ് കോവളത്തിന് സമീപ​െത്ത ആളൊഴിഞ്ഞ പ്രദേശത്ത്​ വിദേശവനിതയുടെ മൃതദേഹം കണ്ടെത്തിയത്. 

തിരുവനന്തപുരത്തെ സ്വകാര്യ ആയുർവേദകേന്ദ്രത്തിൽ ചികിത്സക്കെത്തിയ ലിഗയെ അവിടെനിന്ന്​ കാണാതാകുകയായിരു​ന്നു. ഭർത്താവും സഹോദരിയും പൊലീസിൽ പരാതി നൽകി. പൊലീസ്​ ശരിയായരീതിയിൽ അന്വേഷിച്ചില്ലെന്ന്​ ആരോപണമുയർന്നു. ലിഗയെ കണ്ടെത്താൻ പ്രത്യേക പൊലീസ്​ സംഘത്തെ നിയോഗിച്ചിരുന്നു. അതിനൊടുവിലാണ്​ ദിവസങ്ങൾക്കുശേഷം മൃതദേഹം കണ്ടെത്തിയത്​​. ഭർത്താവും സഹോദരിയും മൃതദേഹം തിരിച്ചറിയുകയും ശാസ്​ത്രീയപരിശോധനയിലൂടെ ലിഗയുടേത്​ സ്​ഥിരീകരിക്കുകയും ചെയ്​തു. 

തുടർന്നുള്ള അന്വേഷണത്തിലാണ്​ സമീപവാസികളായ ഉദയൻ, ഉമേഷ്​ എന്നിവരെ അറസ്​റ്റ്​ ചെയ്​തത്. ആയുർവേദ ചികിത്സകേന്ദ്രത്തിൽനിന്ന്​ കോവളത്തെത്തിയ ലിഗയെ സ്ഥലങ്ങള്‍ കാണിക്കാമെന്ന് പറഞ്ഞ് ഉമേഷും ഉദയനും ചേര്‍ന്ന് കുറ്റിക്കാട്ടിലേക്ക് കൂട്ടിക്കൊണ്ടുപോയെന്ന് കുറ്റപത്രത്തില്‍ പറയുന്നു. ഇവിടെെവച്ച് മയക്കുമരുന്ന് നല്‍കിയശേഷം ബലാത്സംഗം ചെയ്തു. മയക്കത്തിലായ യുവതി ഉണര്‍ന്നപ്പോള്‍ പ്രതികള്‍ വീണ്ടും ഉപദ്രവിക്കാന്‍ ശ്രമിച്ചു. ഇത്​ പ്രതിരോധിച്ച ലിഗയെ കഴുത്ത്​ ഞെരിച്ച് കൊലപ്പെടുത്തിയെന്നും മൃതദേഹം കുറ്റിക്കാട്ടില്‍ ഉപേക്ഷിച്ചെന്നും ​കുറ്റപത്രത്തിൽ പറയുന്നു. 

കൊലപാതകം, ബലാത്സംഗം, തെളിവ് നശിപ്പിക്കല്‍, മയക്കുമരുന്ന് ഉപയോഗം തുടങ്ങിയ കുറ്റങ്ങളാണ്​ ആരോപിച്ചിട്ടുള്ളത്​. എന്നാൽ, കേസില്‍ സി.ബി.ഐ അന്വേഷണം വേണമെന്ന്​ ആവശ്യപ്പെട്ട്​ വിദേശവനിതയുടെ ബന്ധുക്കളുൾപ്പെടെ ഹൈകോടതിയെ സമീപിച്ചിരുന്നു. ഇൗ ആവശ്യം ഹൈകോടതി തള്ളിയതിന് പിന്നാലെയാണ് പൊലീസ് കുറ്റപത്രം നല്‍കിയത്. ഇതിനിടെ പ്രതികള്‍ക്ക് ഹൈകോടതി ഉപാധികളോടെ ജാമ്യം അനുവദിച്ചിരുന്നു.