സ്വകാര്യ വനഭൂമിയിൽ 50 സെന്‍റ്​ വരെ കൈവശം വെച്ചവർക്ക്​ രേഖ; ബിൽ പാസായി

തിരുവനന്തപുരം: സ്വകാര്യ വനഭൂമിയിൽ 50 സെന്‍റ്​ വരെ കൈവശം വെച്ചവർക്ക്​ കൈവശരേഖ നൽകാൻ വ്യവസ്ഥ ചെയ്യുന്ന സ്വകാര്യ വനം നിക്ഷിപ്തമാക്കൽ ബിൽ നിയമസഭ പാസാക്കി. 1971ലെ കേരള സ്വകാര്യ വനങ്ങൾ (നിക്ഷിപ്​തമാക്കലും പതിച്ചുകൊടുക്കലും) നിയമത്തിലാണ്​ ഭേദഗതി.

1971 മേയ്​ 10 മുതൽ മുൻകാല പ്രാബല്യം ഇതിനുണ്ടാകും. ചെറുകിട കർഷകരെ ബാധിക്കുന്ന വിഷയമെന്ന നിലയിലാണ്​ സർക്കാർ നിയമഭേദഗതിക്ക്​ തയാറായത്​. റവന്യൂ-വനം വകുപ്പുകൾ തമ്മിൽ ഇതിൽ ഭിന്നതയുണ്ടായിരുന്നു. 50 സെന്‍റ്​ വരെ അനുമതി നൽകാമെന്ന നിലപാടായിരുന്നു റവന്യൂ വകുപ്പിന്​.

പിന്നീട്,​ വനം-റവന്യൂ മന്ത്രിമാർ നടത്തിയ ചർച്ചയിൽ ഇതിൽ ധാരണയായി. സഭയിൽ ബഹളമായതിനാൽ ചർച്ചയില്ലാതെയാണ്​ ബിൽ പാസായത്​.