ബൂട്ടഴിച്ച്​ അവർ പാടത്തിറങ്ങി; പുറപ്പുഴയിൽ നെൽകൃഷിക്ക്​ കിക്കോഫ്

തൊടുപുഴ: ലോക്​ഡൗണിനെത്തുടർന്ന്​ മൈതാനങ്ങളിൽനിന്ന്​ വിലക്കപ്പെട്ടവർ ബൂട്ടഴിച്ച്​ പാടത്തിറങ്ങിയപ്പോൾ ​നെൽകൃഷിക്ക്​ ‘കിക്കോഫ്’​. കളിക്കളത്തിലെ ജഗ്ലിങ്ങും ഡ്രിബ്ലിങ്ങും പന്തടക്കവുമെല്ലാം ഇനി കുറച്ചുനാൾ പുറപ്പുഴ പാടത്ത്​ പരീക്ഷിക്കാൻ ഒരുങ്ങുകയാണ്​ തൊടുപുഴ സോക്കർ സ്​കൂൾ അക്കാദമി പരിശീലകനായ സലിംകുട്ടിയും കുട്ടികളു​ം. ലോക്​ഡൗൺ പ്രഖ്യാപിച്ചശേഷം കളിക്കളങ്ങൾക്കെല്ലാം പൂട്ട്​ വീണു​​​. സ്​പോർട്​സ്​ ഹോസ്​റ്റലുകളും ജിംനേഷ്യങ്ങളും അടഞ്ഞുതന്നെ. ഈ സാഹചര്യത്തിലാണ്​ പരി​ശീലനത്തിനടക്കം മാർഗമില്ലാതെ വന്നതോടെ  കുട്ടികളുടെ കായികശേഷി നിലനിർത്താൻ​​ പുറപ്പുഴയിൽ ഒരേക്കർ സ്ഥലം പാട്ടത്തിനെടുത്ത്​ കൃഷിയിറക്കാൻ സലീംകുട്ടി ആലോചിക്കുന്നത്​. കുട്ടികളുമായി ആലോചിച്ചപ്പോൾ അവർക്കും​ സമ്മതം. അങ്ങനെ തങ്ങളുടെ ​േജഴ്​സികളും അണിഞ്ഞ്​ ബൂട്ടുകൾ അഴിച്ചുവെച്ച്​ അവർ പാടത്തേക്കിറങ്ങി. 

ഇടുക്കി ജില്ലയില്‍നിന്ന് കേരള സന്തോഷ്​ട്രോഫി ടീമില്‍ ആദ്യമായി ഇടംനേടിയ ആളാണ്​ സലീംകുട്ടി. 1990-’91ൽ കേരളത്തിനുവേണ്ടി സന്തോഷ്​ ട്രോഫി കളിച്ച സലീംകുട്ടി ഇന്ത്യൻ ക്യാമ്പിലെത്തിയെങ്കിലും പരിക്കുമൂലം കളിക്കളം വിടേണ്ടിവന്നു. എങ്കിലും പുതുതലമുറക്ക്​ താൻ അറിഞ്ഞ അറിവുകൾ പഠിപ്പിക്കുകയെന്നത്​ ദൗത്യമായി അദ്ദേഹം ഏറ്റെടുത്തു​. തൊടുപുഴയിലെയും സമീപ പ്രദേശങ്ങളിലെയും സ്​കൂൾ ഗ്രൗണ്ടുകളിലായിരുന്നു ആദ്യകാലങ്ങളിൽ അദ്ദേഹം ഫുട്​ബാളിൽ താൽപര്യമുള്ള കുട്ടികൾക്ക്​ സൗജന്യമായി പരിശീലനം നൽകിയത്​.  പിന്നീട്​ സ്​കൂൾ ഗ്രൗണ്ടുകൾ പല തടസ്സങ്ങൾമൂലം കിട്ടാതായതോടെ പരിശീലനം അടിക്കടി മുടങ്ങി.

ഈ സാഹചര്യത്തെ നേരിടാൻ സ്ഥലം പാട്ടത്തിനെടുത്ത്​ ഫുട്​ബാൾ ഗ്രൗണ്ട്​ നിർമിക്കുകയായിരുന്നു സലിംകുട്ടി​.  ഇപ്പോൾ ആരെയും ആശ്രയിക്കാതെ ഒരുവർഷമായി ഈ ഗ്രൗണ്ടിൽ കുട്ടികൾക്ക്​ പരിശീലനം നൽകുന്നു. 150 കുട്ടികൾ ഇപ്പോൾ ഇവിടെ പരിശീലനത്തിനെത്തുന്നുണ്ട്​. കഴിവുള്ള നിർധനരായ കുട്ടികൾക്ക്​ സൗജന്യമായാണ്​ പരിശീലനം​​. മങ്ങാട്ടുകവലയിൽ ഹോട്ടൽ നടത്തുന്നുണ്ടെങ്കിലും ഫുട്​ബാളാണ്​ ഇദ്ദേഹത്തിന്​ ജീവവായു. കുട്ടികൾക്ക്​ ദിവസവും ഫുട്ബാൾ പരീശീലനമടക്കം നൽകിയ ശേഷമാണ്​ സലീംകുട്ടി ഹോട്ടലി​​​െൻറ കാര്യങ്ങൾ നോക്കുന്നത്​. 
ലക്ഷ്യം തെറ്റാതെ വലയിലേക്ക്​ പന്ത്​ തൊടുക്കുന്ന​ ലാഘവത്തോടെ കുട്ടികൾ പാടത്തേക്ക്​ വിത്തെറിയു​ന്നത്​ കാണാൻ ദ്രോണാചാര്യ തോമസ്​ മാഷ്​, ഏഷ്യൻ ഗെയിംസ്​ മെഡൽ ​ജേതാവ്​ മീനു, പ്രദേശവാസികളായ നാട്ടുകാരുമൊക്കെ രാവിലെതന്നെ പുറപ്പുഴ പാടത്ത്​ എത്തിയിരുന്നു.