ഭക്ഷ്യക്കിറ്റ്​: കമീഷൻ കുടിശ്ശിക നൽകിയില്ലെങ്കിൽ ഉദ്യോഗസ്ഥരെ വിളിച്ചു വരുത്തുമെന്ന്​​ ഹൈകോടതി

കൊച്ചി: കോവിഡ് കാലത്ത് സൗജന്യ ഭക്ഷ്യക്കിറ്റുകളും ഓണക്കിറ്റുകളും വിതരണം ചെയ്തതിന്‍റെ കമീഷൻ കുടിശ്ശിക റേഷൻ കടയുടമകൾക്ക് ഡിസംബർ 23നകം വിതരണം ചെയ്യാത്തപക്ഷം ഉന്നത ഉദ്യോഗസ്ഥർ നേരിട്ട്​ ഹാജരാകേണ്ടിവരുമെന്ന്​ ഹൈകോടതി. കുടിശ്ശിക രണ്ടു മാസത്തിനകം നൽകാൻ ഫെബ്രുവരി രണ്ടിന്​ ഹൈകോടതി ഉത്തരവിട്ടിട്ടും നൽകാത്തതിനെതിരായ കോടതിയലക്ഷ്യ ഹരജി പരിഗണിക്കവേയാണ്​ ജസ്റ്റിസ്​ എൻ. നഗരേഷിന്‍റെ അന്ത്യശാസനം.

ഓൾ കേരള റീട്ടെയിൽ റേഷൻ ഡീലേഴ്‌സ് അസോസിയേഷൻ നൽകിയ ഹരജിയിലാണ്​ റേഷൻ കടയുടമകൾക്ക് എത്രയും വേഗം കുടിശ്ശിക നൽകാൻ ഉത്തരവിട്ടത്​. സൗജന്യ ഭക്ഷ്യക്കിറ്റിന് ഏഴു രൂപ നിരക്കിലും ഓണക്കിറ്റിന് അഞ്ചു രൂപ നിരക്കിലും കമീഷൻ നൽകാനായിരുന്നു നിർദേശം.

ഫെബ്രുവരിയിലെ ഉത്തരവ്​ നടപ്പാക്കി ഡിസംബർ 23നകം റിപ്പോർട്ട്​ നൽകണമെന്നും വീഴ്‌ച വരുത്തിയാൽ ഭക്ഷ്യ സെക്രട്ടറിയും സിവിൽ സപ്ലൈസ് ഡയറക്ടറും നേരിട്ട്​ ഹാജരാകേണ്ടി വരുമെന്നുമാണ്​ ഇടക്കാല ഉത്തരവ്​​.