ഭക്ഷണ കിറ്റ്​ വേണ്ടെങ്കിൽ വെബ്​സൈറ്റ്​ വഴി ആവശ്യക്കാർക്ക് സംഭാവന നൽകാം -മുഖ്യമന്ത്രി​

തിരുവനന്തപുരം: റേഷൻ കാർഡുടമകൾക്കുള്ള 17 ഇനങ്ങളടങ്ങിയ ഭക്ഷണ കിറ്റുകൾ ആവശ്യമില്ലാത്തവർക്ക്​ അത്​ കൂടുതൽ ആവശ്യമുള്ള മറ്റൊരാൾക്ക്​ നൽകാൻ സംവിധാനമുണ്ടെന്ന്​ മുഖ്യമന്ത്രി പിണറായി വിജയൻ. അതിനു കഴിവും ന്നദ്ധതയുമുള്ളവർ​ സിവിൽ സപ്ലൈസ് കോർപറേഷ​​​െൻറ വെബ്സൈറ്റ് സന്ദർശിച്ച്​ അതിൽ ‘ഡൊണേറ്റ്​ മൈ കിറ്റ്​’ എന്ന ഓപ്​ഷനിൽ കാർഡ്​ നമ്പർ നൽകി കിറ്റ്​ സംഭാവന ചെയ്യാനുള്ള സമ്മതം അറിയിക്കണമെന്ന്​ മുഖ്യമന്ത്രി ഫേസ്​ബുക്കിലൂടെ ആവശ്യപ്പെട്ടു.

കോവിഡ് 19 പകർച്ചവ്യാധി കാരണം ലോക്ഡൗൺ പ്രഖ്യാപിച്ച സാഹചര്യത്തിൽ നിത്യവേതനക്കാർ, സ്ഥിരവരുമാനമില്ലാത്തവർ, ചെറുകിട കർഷകർ, തുടങ്ങി കാര്യമായ നീക്കിയിരിപ്പു കയ്യിലില്ലാത്തവർ തുടങ്ങി പ്രതിസന്ധിയിലായേക്കാവുന്ന നിരവധി കുടുംബങ്ങൾ സംസ്ഥാനത്തുണ്ട്​. മുഖ്യമായും അവരെ കണക്കിലെടുത്താണ് എല്ലാ റേഷൻ കാർഡുടമകൾക്കും 17 ഇനങ്ങൾ അടങ്ങിയ സൗജന്യ ഭക്ഷ്യധാന്യ കിറ്റ് സർക്കാർ നൽകുന്നത്. എന്നാൽ നിങ്ങളിൽ ചിലരെങ്കിലും അത് ആവശ്യമില്ലാത്തവരാകാം.

കിറ്റ് ആവശ്യമില്ലാത്തവർ അത്​ കൂടുതൽ ആവശ്യമുള്ള മറ്റൊരാൾക്ക് നൽകാൻ വെബ്​സൈറ്റ്​ വഴി സമ്മതം അറിയിച്ച്​ ബുദ്ധിമുട്ടനുഭവിക്കുന്ന ആരുംതന്നെ കേരളത്തിലുണ്ടാകില്ലെന്ന് ഉറപ്പു വരുത്താൻ സഹായിക്കണമെന്നും അദ്ദേഹംവ്യക്തമാക്കി.

മുഖ്യമ​ന്ത്രിയുടെ ഫേസ്​ബുക്ക്​ പോസ്​റ്റ്​: