You are here

പ്രളയ സെസ്‌ ആഗസ്​റ്റ് ഒന്ന്​ മുതൽ; സർക്കാർ ഉത്തരവിറങ്ങി 

20:12 PM
19/07/2019

തിരുവനന്തപുരം: സംസ്ഥാനത്ത് ചരക്കുസേവന നികുതിക്കൊപ്പം ഒരുശതമാനം പ്രളയ സെസ്‌ കൂടി ഏർപ്പെടുത്തി സർക്കാർ ഉത്തരവായി. ആഗസ്​റ്റ് ഒന്ന്​ മുതലാണ് സെസ് നൽകേണ്ടത്. പ്രളയാനന്തര പുനർനിർമാണത്തിനു വേണ്ടിയാണ് സംസ്ഥാനത്തിനകത്തുള്ള സേവനങ്ങളുടെയും ചരക്കുകളുടെയും വിതരണത്തിൽ  സെസ് ചുമത്തുന്നത്. 

സ്വർണം ഒഴികെ അഞ്ച്​ ശതമാനമോ അതിൽ താഴയോ നികുതിയുള്ള ചരക്കുകൾക്കും സേവനങ്ങൾക്കും സെസ് ബാധകമല്ല. കോമ്പോസിഷൻ രീതി ​െതരഞ്ഞെടുത്ത വ്യാപാരികളെയും സെസിൽനിന്ന്​ ഒഴിവാക്കിയിട്ടുണ്ട്. ജി.എസ്​.ടി നിയമത്തിലെ അഞ്ചാമത്തെ പട്ടികയിൽ വരുന്ന സ്വർണം, വെള്ളി, പ്ലാറ്റിനം, ഇവ കൊണ്ടുള്ള ആഭരണം എന്നിവക്ക്​ 0.25 ശതമാനവും മറ്റുള്ള ചരക്കുകളുടെയും സേവനങ്ങളുടെയും വിതരണ മൂല്യത്തിന്മേൽ ഒരു ശതമാനവുമാണ് സെസ്.

 പ്രളയ സെസ്‌ ഈടാക്കുന്നതിനാവശ്യമായ മാറ്റങ്ങൾ ബില്ലിങ്​ സോഫ്ട്‍വെയറിൽ വരുത്തുവാൻ വ്യാപാരികൾക്ക്​ നിർദേശം നൽകിയിട്ടുണ്ട്​. അതത്​ മാസത്തെ പ്രളയ സെസ് സംബന്ധിച്ച വിവരങ്ങൾ www.keralataxes.gov.in എന്ന വെബ്‌സൈറ്റ് വഴി സമർപ്പിക്കണം.


 

Loading...
COMMENTS