അന്ന് രാഹുൽ തരംഗം, ഇന്നോ? യു.ഡി.എഫ് വിജയത്തിന് പിന്നിലെ അഞ്ച് കാരണങ്ങൾ ഇവ

2019ൽ ആഞ്ഞടിച്ച രാഹുൽ തരംഗത്തിന് സമാനമായ വിജയം തന്നെയാണ് ഇക്കുറിയും ലോക്സഭ തെരഞ്ഞെടുപ്പിൽ സംസ്ഥാനത്ത് യു.ഡി.എഫിനുണ്ടായത്. അന്ന് 20ൽ 19 സീറ്റും നേടിയപ്പോൾ ഇക്കുറി ഒന്ന് കുറഞ്ഞ് 18 ആയെന്ന് മാത്രം. 2019ലെ ലോക്സഭ തെരഞ്ഞെടുപ്പിന് ശേഷമുണ്ടായ തദ്ദേശ തെരഞ്ഞെടുപ്പിലും നിയമസഭ തെരഞ്ഞെടുപ്പിലും യു.ഡി.എഫ് പിന്നിൽ പോയിരുന്നു. എന്നാൽ, ലോക്സഭ തെരഞ്ഞെടുപ്പിൽ നേട്ടമുണ്ടാക്കുകയെന്ന പതിവ് ഇക്കുറിയും തുടർന്നു. യു.ഡി.എഫ് വിജയത്തിന് പിന്നിലെ അഞ്ച് കാരണങ്ങൾ പരിശോധിക്കാം.

1. വീണ്ടും രാഹുൽ തരംഗം

2019ൽ രാഹുൽ ഗാന്ധിയെ പ്രധാനമന്ത്രി സ്ഥാനാർഥിയായി ഉയർത്തിക്കാട്ടിയായിരുന്നു കോൺഗ്രസ് തെരഞ്ഞെടുപ്പിനെ നേരിട്ടത്. അമേത്തിയോടൊപ്പം വയനാട്ടിൽ കൂടി രാഹുൽ മത്സരിച്ചതോടെ കേരളത്തിൽ രാഹുൽ തരംഗം ആഞ്ഞുവീശി. ദേശീയതലത്തിൽ തരംഗമുണ്ടായില്ലെങ്കിലും കേരളത്തിൽ 20ൽ 19 സീറ്റും യു.ഡി.എഫ് സ്വന്തമാക്കി. ഇടതുപക്ഷത്തിന്‍റെ ശക്തികേന്ദ്രങ്ങൾ പോലും യു.ഡി.എഫ് പിടിച്ചെടുത്തു. വയനാട്ടിൽ 4,31,770 വോട്ടിനാണ് രാഹുൽ വിജയിച്ചത്. ഇത്തവണയും രാഹുൽ വയനാട്ടിൽ മത്സരിച്ചു. എന്നാൽ, വയനാട്ടിൽ മത്സരിക്കുന്നുവെന്നതിനേക്കാൾ ദേശീയതലത്തിൽ ഇൻഡ്യ മുന്നണിക്ക് നേതൃത്വം നൽകുന്നുവെന്ന കാര്യമാണ് രാഹുലിനൊപ്പം ഇത്തവണയും നിൽക്കാൻ വോട്ടർമാരെ പ്രേരിപ്പിച്ചത്.

2. ഭരണവിരുദ്ധ വികാരം

സംസ്ഥാനത്ത് ഭരണവിരുദ്ധ വികാരം നിലനിൽക്കുന്നുവെന്ന് ചൂണ്ടിക്കാട്ടുന്നതാണ് ലോക്സഭ തെരഞ്ഞെടുപ്പ് ഫലം. എൽ.ഡി.എഫിന് അനുകൂലമായി അസംബ്ലി തെരഞ്ഞെടുപ്പിൽ വോട്ട് ചെയ്ത പല മണ്ഡലങ്ങളും ഇത്തവണ യു.ഡി.എഫ് പക്ഷത്ത് ചാഞ്ഞതായി കാണാം. 110 നിയമസഭ സീറ്റുകളിൽ യു.ഡി.എഫാണ് മുന്നിലെത്തിയത്. അധികാരത്തിലുള്ള ഇടത് മുന്നണിക്ക് 140ൽ 18 നിയമസഭ മണ്ഡലങ്ങളിൽ മാത്രമാണ് മുന്നിലെത്താനായത്. യു.ഡി.എഫിന് അനുകൂലമായ മറ്റൊരു ശക്തമായ സാഹചര്യവും ഇല്ലാതിരുന്നിട്ടും വലിയ വിജയം സമ്മാനിച്ചതിൽ ഭരണവിരുദ്ധ വികാരം തെളിഞ്ഞുകാണാമെന്നാണ് വിലയിരുത്തൽ. പെർമിറ്റ് ഫീസ് വർധന, കരുവന്നൂർ ബാങ്ക് തട്ടിപ്പ്, സപ്ലൈകോയിൽ സാധനങ്ങളില്ലാത്തത് തുടങ്ങി വിവിധ വിഷയങ്ങൾ സർക്കാറിനെതിരെ ജനവികാരം ഉയർത്തി.

3. ന്യൂനപക്ഷ വോട്ടുകൾ

ദേശീയതലത്തിൽ ബി.ജെ.പി മുന്നണിയെ നേരിടുന്ന തെരഞ്ഞെടുപ്പിൽ ന്യൂനപക്ഷ വോട്ടുകൾ നിർണായകമായിരുന്നു. എന്നാൽ,​ ന്യൂ​ന​പ​ക്ഷ വോട്ടുകൾ തങ്ങൾക്ക് ലഭിക്കുമെന്ന സി.​പി.​എ​മ്മി​ന്‍റെ പ്രതീക്ഷകൾക്ക് ക​ന​ത്ത തി​രി​ച്ച​ടി​യേറ്റു. മു​സ്​​ലിം സ​മു​ദാ​യ​ത്തി​ൽ​നി​ന്ന്​ നേ​ര​ത്തേ നി​രു​പാ​ധി​ക പി​ന്തു​ണ ല​ഭി​ച്ച​വ​രു​ടെ വോ​ട്ട്​ സ​മാ​ഹ​രി​ക്കാ​ൻ പോ​ലും ഇ​ത്ത​വ​ണ സി.​പി.​എ​മ്മി​നാ​യി​ല്ല. സാ​മു​ദാ​യി​ക ബ​ന്ധ​മു​ള്ള ദേ​ശീ​യ, അ​ന്താ​രാ​ഷ്ട്ര വി​ഷ​യ​ങ്ങ​ളി​ൽ ശ​ക്ത​മാ​യ പ്ര​തി​ക​ര​ണം ന​ട​ത്തു​ക​യും സം​സ്ഥാ​ന ഭ​ര​ണ​ത്തി​ൽ മു​സ്‍ലിം വി​കാ​രം മാ​നി​ക്കാ​തി​രി​ക്കു​ക​യും ചെ​യ്യു​ന്ന നി​ല​പാ​ടി​നെ​തി​രാ​യ പ്ര​തി​ക​ര​ണ​മാ​ണ്​ തെ​ര​ഞ്ഞെ​ടു​പ്പി​ൽ നി​ഴ​ലി​​ച്ച​തെ​ന്ന്​ വി​ല​യി​രു​ത്ത​പ്പെ​ടു​ന്നു. സ​മ​സ്ത​യും മു​സ്‍ലിം ലീ​ഗും ത​മ്മി​ലെ പ്ര​ശ്ന​ങ്ങ​ളി​ൽ മു​ത​ലെ​ടു​പ്പി​നു​ള്ള പാ​ർ​ട്ടി ശ്ര​മം ഗു​ണ​ത്തേ​ക്കാ​ളേ​റെ​ ദോ​ഷം ചെ​യ്തെ​ന്നാ​ണ്​ പൊ​ന്നാ​നി​യി​ലെ അ​ബ്​​ദു​സ്സ​മ​ദ്​ സ​മ​ദാ​നി​യു​ടെ ഭൂ​രി​പ​ക്ഷം വ്യ​ക്ത​മാ​ക്കു​ന്ന​ത്.

4. ഇടത് സ്ഥാനാർഥി നിർണയം

ഇത്തവണ ഇടതുമുന്നണിക്ക് സ്ഥാനാർഥി നിർണയത്തിൽ വീഴ്ചയുണ്ടായതായാണ് വിലയിരുത്തൽ. മികച്ച സ്ഥാനാർഥികളെ നിർത്തിയ മണ്ഡലങ്ങളിൽ അതിലും മികച്ചവരെ ഇറക്കാനും യു.ഡി.എഫിനായി. യു.ഡി.എഫിന്‍റെ സിറ്റിങ് എം.പിമാർക്കെതിരെ പലയിടത്തും കാര്യമായ വിമർശനം ഉയർന്നിരുന്നു. എന്നിട്ടും, സ്ഥാനാർഥി നിർണയത്തിലൂടെ അത് മുതലാക്കാൻ ഇടതിന് കഴിഞ്ഞില്ല. പാലക്കാട് വി.കെ. ശ്രീകണ്ഠനെതിരെ എ. വിജയരാഘവനെ മത്സരിപ്പിച്ചതും കോഴിക്കോട് എം.കെ. രാഘവനെതിരെ എളമരം കരീമിനെ മത്സരിപ്പിച്ചതും മികച്ച തീരുമാനമായിരുന്നില്ല. എറണാകുളത്ത് കെ.ജെ. ഷൈൻ, കണ്ണൂരിൽ എം.വി. ജയരാജൻ, കാസർകോട് എം.വി. ബാലകൃഷ്ണൻ എന്നിവരും പിന്നിൽപോയി. വടകര പിടിക്കാൻ കെ.കെ. ശൈലജയെ ഇറക്കിയെങ്കിലും ഷാഫി പറമ്പിലിനെ കൊണ്ടുവന്ന് യു.ഡി.എഫ് വിജയം നിലനിർത്തി. അതേസമയം, ആലത്തൂരിൽ കെ. രാധാകൃഷ്ണനെ ഇറക്കി വിജയം നേടുകയും ചെയ്തു.

5. ബി.ജെ.പി വിരുദ്ധ വോട്ടുകളുടെ ഏകീകരണം

ബി.ജെ.പി വിരുദ്ധ വോട്ടുകൾ യു.ഡി.എഫിന് അനുകൂലമായി ഏകീകരിച്ചുവെന്ന് തെരഞ്ഞെടുപ്പ് ഫലത്തിൽ കാണാം. ദേശീയതലത്തിൽ ബി.ജെ.പിക്കെതിരെ കോൺഗ്രസ് സ്വീകരിച്ച ശക്തമായ നിലപാടുകൾ കേരളത്തിലെ ഫാഷിസ്റ്റ് വിരുദ്ധ വോട്ടുകൾ കോൺഗ്രസിന് നേടിക്കൊടുത്തു. ഇതോടൊപ്പം, ഇൻഡ്യ സഖ്യത്തിൽ കോൺഗ്രസും ഇടതുപക്ഷവും ഒന്നിച്ചാണെന്നതും ഒരു കാരണമായി. സഖ്യമായി ബി.ജെ.പിയെ നേരിടുമ്പോൾ ഇടതിനേക്കാൾ പരിഗണന വോട്ടർമാർ കോൺഗ്രസിന് നൽകി. അതേസമയം, ഇൻഡ്യ സഖ്യത്തിൽ നിൽക്കുമ്പോഴും കോൺഗ്രസിനേയും രാഹുൽ ഗാന്ധിയെയും രൂക്ഷമായി വിമർശിച്ച മുഖ്യമന്ത്രിയുടേത് ഉൾപ്പെടെയുള്ള നിലപാടുകളും വോട്ടർമാരെ യു.ഡി.എഫിന് അനുകൂലമായി ചിന്തിപ്പിച്ചു.