ആരാധനാലയങ്ങളിൽ അഞ്ചു​പേർ: കലക്​ടറുടെ ഉത്തരവ്​ മുഖ്യമന്ത്രിയുടെ ശ്രദ്ധയിൽ കൊണ്ടുവരുമെന്ന്​ ലീഗ്​

മലപ്പുറം: ആരാധനാലയങ്ങളിൽ അഞ്ചുപേർ മാത്രമേ പാടുള്ളൂവെന്ന്​ നിർദേശിച്ച്​ മലപ്പുറം ജില്ല കലക്​ടർ കെ. ഗോപാലകൃഷ്​ണൻ ഏകപക്ഷീയമായി ഇറക്കിയ വിവാദ ഉത്തരവ്​​ തിങ്കളാഴ്​ച നടക്കുന്ന സർവകക്ഷി യോഗത്തിൽ മുഖ്യമന്ത്രിയുടെ ശ്രദ്ധയിൽപെടുത്തുമെന്ന്​ മുസ്​ലിം ലീഗ്​ നേതൃത്വം അറിയിച്ചു. മതസംഘടനകളോടും ജനപ്രതിനിധികളോടും ആലോചിക്കാതെ എടുത്ത തീരുമാനം മുഖ്യമന്ത്രിയെ പോലും തെറ്റിദ്ധരിപ്പിച്ചാണ്​ കലക്​ടർ ഉത്തരവായി ഇറക്കിയതെന്നാണ്​ മനസ്സിലാവുന്നത്​​. എല്ലാവരുടെയും സമ്മതത്തോടെയാണ്​ തീരുമാനമെടുത്തതെന്നാണ്​ കരുതുന്നതെന്ന്​​ മുഖ്യമന്ത്രി കഴിഞ്ഞ ദിവസം വാർത്തസമ്മേളനത്തിൽ അറിയിച്ചത് ഈ സാഹചര്യത്തിലാണ്​.

മതനേതാക്ക​േളാടും ജനപ്രതിനിധികളോടും ആലോചിക്കാതെ സ്വന്തം നിലയിൽ ഉത്തരവിറക്കുകയും പ്രതിഷേധമുയർന്നപ്പോൾ വീഴ്​ച അവരുടെ തലയിൽ കെട്ടിവെക്കാൻ ശ്രമിക്കുകയും ചെയ്​തത്​ ഉത്തരവാദപ്പെട്ട ഉദ്യോഗസ്ഥ​െൻറ ഭാഗത്തുനിന്നുണ്ടാവാൻ പാടില്ലാത്ത സമീപനമാണ്​. യോഗത്തിൽ വിഷയം ശക്തമായി ഉന്നയിക്കുമെന്ന്​ മുസ്​ലിം ലീഗ്​ സംസ്ഥാന ജനറൽ സെക്രട്ടറി പി.എം.എ സലാം, മുതിർന്ന നേതാവ്​ കെ.പി.എ മജീദ്​ എന്നിവർ അറിയിച്ചു.

വെള്ളിയാഴ്​ച ഉച്ചക്കു​ ശേഷമാണ്​​ ഉത്തരവ്​ സംബന്ധിച്ച വാർത്ത പുറത്തുവന്നത്​.​ മതനേതാക്കളും രാഷ്​ട്രീയ പാർട്ടികളും ജനപ്രതിനിധികളും ശക്തമായ പ്രതിഷേധവുമായി രംഗത്തുവന്നതോടെയാണ്​​​ തീരുമാനം മരവിപ്പിക്കാൻ കലക്​ടർ നിർബന്ധിതനായത്​. മലപ്പുറത്തേക്കാൾ കൂടുതൽ കേസുകൾ റിപ്പോർട്ട് ചെയ്ത ജില്ലകളിലൊന്നുമില്ലാത്ത നിയന്ത്രണം ഏർപ്പെടുത്താൻ കലക്​ടർ ശ്രമിച്ചപ്പോഴാണ്​ മുസ്​ലിം നേതൃത്വം സംയുക്തമായി പ്രതിഷേധിച്ചത്​.

ജിഫ്​രി മുത്തുകോയ തങ്ങൾ, പ്രഫ. കെ. ആലിക്കുട്ടി മുസ്​ലിയാർ, അബ്​ദുസ്സമദ് പൂക്കോട്ടൂർ (സമസ്​ത കേരള ജംഇയ്യതുൽ ഉലമ), യു. മുഹമ്മദ് ശാഫി (സുന്നി മഹല്ല് ഫെഡറേഷൻ സംസ്ഥാന ജനറൽ സെക്രട്ടറി), സലീം എടക്കര (എസ്.വൈ.എസ്), കൂറ്റമ്പാറ അബ്​ദുറഹ്​മാൻ ദാരിമി, അബ്​ദുറസാഖ് സഖാഫി, ഹുസൈൻ സഖാഫി (കേരള മുസ്​ലിം ജമാഅത്ത്), എൻ.വി. അബ്​ദുറഹ്​മാൻ (കെ.എൻ.എം), പി. മുജീബ് റഹ്​മാൻ, ശിഹാബ് പൂക്കോട്ടൂർ, എൻ.കെ. സദ്റുദ്ദീൻ (ജമാഅത്തെ ഇസ്​ലാമി), ടി.കെ. അശ്റഫ് (വിസ്ഡം ഗ്ലോബൽ ഇസ്​ലാമിക് മിഷൻ), അബ്​ദുല്ലത്വീഫ് കരുമ്പിലാക്കൽ, ഡോ. ജാബിർ അമാനി (കെ.എൻ.എം മർകസുദ്ദഅ്​വ), ഹാശിം ഹദ്ദാദ് തങ്ങൾ (ജംഇയ്യതുൽ ഉലമ ഹിന്ദ്), ഡോ. ഖാസിമുൽ ഖാസിമി (കേരള മുസ്‌ലിം ജമാഅത്ത് കൗൺസിൽ) എന്നിവരാണ്​ പ്രതിഷേധത്തിന്​ നേതൃത്വം നൽകിയത്​.