മത്സ്യഫെഡ് തിരിമറി; ഒളിവിലായിരുന്ന ഉദ്യോഗസ്ഥൻ അറസ്റ്റിൽ

കൊല്ലം: മത്സ്യഫെഡിന്‍റെ അന്തിപ്പച്ചയിലെ വരുമാനത്തിൽനിന്ന് ഒരു കോടിയോളം രൂപ തിരിമറി നടത്തിയ കേസിൽ മത്സ്യഫെഡ് ജൂനിയർ അസിസ്റ്റന്‍റ് പിടിയിലായി. ഒളിവിലായിരുന്ന കരുനാഗപ്പള്ളി ആദിനാട് തെക്ക് കരിച്ചാഴി ചിറയിൽ വീട്ടിൽ അനിമോൻ (46) ആണ് പിടിയിലായത്.

ശക്തികുളങ്ങരയിലെ പ്രീ പ്രോസസിങ് സെന്‍ററിൽ ജൂനിയർ അസിസ്റ്റന്‍റായി ജോലിചെയ്തുവരികയായിരുന്നു. കഴിഞ്ഞ വർഷം ജനുവരിമുതൽ സെപ്റ്റംബർവരെ ഫിഷറീസ് വകുപ്പിന്‍റെ അന്തിപ്പച്ച വാഹനത്തിൽനിന്ന് ലഭിച്ച വിറ്റുവരവ് കുറച്ചു കാണിച്ചാണ് ഇയാളും സഹായി മഹേഷും 94 ലക്ഷം രൂപ തിരിമറി നടത്തിയത്.