'ഞാൻ സങ്കരയിനമാണെങ്കിൽ ഇദ്ദേഹം ഇതേത്​ ഇനമാണ്, പാർട്ടി ചിഹ്നം പോലുമില്ല'; ജലീലിനെതിരെ ഫിറോസ്​ കുന്നംപറമ്പിൽ

മലപ്പുറം: ജില്ലയിൽ പൊടിപാറും മത്സരം നടക്കുന്ന മണ്ഡലങ്ങളിലൊന്നാണ്​ തവനൂർ. സിറ്റിങ്​ എം.എൽ.എയും മന്ത്രിയുമായ കെ.ടി ജലീലിനെ നേരിടാൻ ഓൺലൈൻ ചാരിറ്റിയിലൂടെ ശ്രദ്ധേയനായ ഫിറോസ്​ കുന്നംപറമ്പിലിനെയാണ്​ യു.ഡി.എഫ്​ നിയോഗിച്ചിരിക്കുന്നത്​. പരസ്​പരം ആരോപണങ്ങൾ ഉന്നയിച്ചും കൈയ്യടി നേടിയും ഇരുവരും പ്രചാരണം കൊഴുപ്പിക്കുകയാണ്​.

തനിക്കെതിരെ മത്സരിക്കുന്നത്​ സങ്കരയിനം സ്ഥാനാർഥിയാണെന്ന ജലീലിന്‍റെ പ്രസ്​താവനക്ക്​ അതേ നാണയത്തിൽ ഫിറോസ്​ മറുപടി കൊടുത്തത്​ ഇങ്ങനെ: ''ഞാൻ സങ്കരയിനമാണെങ്കിൽ ഇദ്ദേഹം ഇതേത്​ ഇനമാണ്​. ഫിറോസ്​ കുന്നംപറമ്പിൽ ഒരു കോൺഗ്രസുകാരനായിരുന്നു. ഇപ്പോൾ ലീഗിലേക്ക്​ വന്നു. ഇപ്പോൾ യു.ഡി.എഫ്​ സീറ്റിൽ കൈപ്പത്തി അടയാളത്തിൽ ഞാൻ മത്സരിക്കുന്നു. പക്ഷേ അദ്ദേഹം ലീഗുകാരനായിരുന്നു. ഇപ്പോൾ സി.പി.എം ആണെന്ന്​ പറയുന്നുണ്ട്​. അവരോട്​ ​േചാദിച്ചാൽ പറയും ഞങ്ങളുടെ ആളല്ല. ചിഹ്നം ചോദിച്ചാൽ ആക്രിക്കടയിലെ കപ്പും സോസറുമാണ്​. ഇദ്ദേഹമാണ്​ ഫിറോസ്​ ഒരു സങ്കരയിനമാണെന്ന്​ പറയുന്നത്​''.