അണയാതെ തീ, കപ്പലിൽ 150ലേറെ കണ്ടെയ്നറുകളിൽ അപകടകരമായ വസ്തുക്കൾ; പരിക്കേറ്റ രണ്ടുപേരുടെ നില ഗുരുതരം

കോഴിക്കോട്: കേരളതീരത്ത് ഇന്നലെ തീപ്പിടിത്തമുണ്ടായ കപ്പൽ എം.​വി. വാ​ൻ​ഹാ​യ് 503ൽ തീപടരുന്നത് തുടരുന്നു. കപ്പലിലെ കൂടുതൽ കണ്ടെയ്നറുകൾ കത്തിക്കൊണ്ടിരിക്കുകയാണ്. കപ്പലിലെ 150ലേറെ കണ്ടെയ്നറുകളിൽ അപകടകരമായ വസ്തുക്കളാണുള്ളതെന്നാണ് വിവരം. ഇവ കത്തുന്നത് പാരിസ്ഥിതിക ഭീഷണികൾക്കിടയാക്കുമെന്നാണ് നിഗമനം. കോസ്റ്റ് ഗാർഡിന്‍റെയും നാവികസേനയുടെയും നേതൃത്വത്തിൽ തീയണക്കാനുള്ള ശ്രമങ്ങൾ തുടരുകയാണ്. കടലിലേക്ക് വീണ കണ്ടെയ്നറുകൾ കേരള തീരത്തേക്ക് ഒഴുകുകയാണ്. അതേസമയം, കപ്പലിലുണ്ടായിരുന്ന നാലുപേരെ ഇനിയും കണ്ടെത്താനുണ്ട്. രക്ഷപ്പെടുത്തിയ 18 പേരിൽ രണ്ടുപേരുടെ നില ഗുരുതരമാണ്.

കണ്ണൂർ അഴീക്കൽ തുറമുഖത്തുനിന്ന് 44 നോ​ട്ടി​ക്ക​ൽ മൈ​ൽ (81 കി​ലോ​മീ​റ്റ​ർ) അ​ക​ലെയുള്ള കപ്പൽ നിലവിൽ ഒഴുകിക്കൊണ്ടിരിക്കുകയല്ല. എന്നാൽ, കപ്പലിനെ നിയന്ത്രിക്കാനും പറ്റാത്ത സാഹചര്യമാണ്. കപ്പൽ കടലിൽ മുങ്ങുകയാണെങ്കിൽ എണ്ണയുൾപ്പെടെ പടർന്ന് വലിയ മലിനീകരണ ഭീഷണിക്കിടയാകും. എണ്ണയും രാസവസ്തുക്കളും കടലിൽ പടരാതിരിക്കാനുള്ള തീവ്ര ശ്രമങ്ങൾ കോസ്റ്റ് ഗാർഡ് നടത്തുന്നുണ്ട്. രക്ഷാപ്രവർത്തനത്തിന് സാൽവേജ് കമ്പനിയെ നിയോഗിക്കാൻ ഡയറക്ടർ ജനറൽ ഓഫ് ഷിപ്പിങ് കോർപറേഷൻ കപ്പൽ കമ്പനിയോട് നിർദേശിച്ചിരുന്നു. ഡച്ച് കമ്പനിയായ സ്മിത്ത് സാൽവേജാണ് ഇതിനായി എത്തുക.

കൊ​ളം​ബോ​യി​ൽ നി​ന്ന് മും​ബൈ​യി​ലേ​ക്കു​പോ​യ സിം​ഗ​പ്പൂ​രി​ന്റെ എം.​വി. വാ​ൻ​ഹാ​യ് 503 എ​ന്ന ച​ര​ക്കു​ക​പ്പ​ലി​ലാണ് ഇന്നലെ സ്ഫോ​ട​ന​ത്തെ​ത്തു​ട​ർ​ന്ന് വ​ൻ തീ​പി​ടി​ത്തമുണ്ടായത്. തി​ങ്ക​ളാ​ഴ്ച രാ​വി​ലെ 9.20നാ​യിരുന്നു അ​പ​ക​ടം. ര​ക്ഷാ​സം​വി​ധാ​ന​ങ്ങ​ളു​മാ​യി ക​ട​ലി​ൽ ചാ​ടി​യ 18 പേ​രെയാണ് ഇ​ന്ത്യ​ൻ നാ​വി​ക​സേ​ന​യും കോ​സ്റ്റ്ഗാ​ർ​ഡും ചേ​ർ​ന്ന് ര​ക്ഷ​പ്പെ​ടു​ത്തിയത്. നാ​ലു​പേ​രെ കാ​ണാ​താ​യി. പൊ​ള്ള​ലേ​റ്റ് അ​ഞ്ചു​പേ​രിൽ ര​ണ്ടു​പേ​രു​ടെ നി​ല അതീവ ഗു​രു​ത​ര​മാ​ണ്. ഇവർ മംഗളൂരു എ.ജെ ആശുപത്രിയിൽ ചികിത്സയിലാണുള്ളത്.

എട്ട് ചൈനക്കാരും ആറു തായ്വാൻ സ്വദേശികളും അഞ്ച് മ്യാ​ന്മ​ര്‍ സ്വദേശികളും മൂന്ന് ഇ​ന്തോ​നേ​ഷ്യക്കാരുമടക്കം 22 ജീ​വ​ന​ക്കാ​രാ​യി​രു​ന്നു ക​പ്പ​ലി​ലു​ണ്ടാ​യി​രു​ന്ന​ത്. കാ​ണാ​താ​യ​വ​രി​ൽ ര​ണ്ടു​പേ​ർ മ്യാ​ന്മ​ർ സ്വ​ദേ​ശി​ക​ളാ​ണ്. തീയണക്കൽ അതീവ ദുഷ്‍കരമാണെന്ന് കോസ്റ്റ് ഗാർഡ് അറിയിച്ചു. കോ​സ്റ്റ് ഗാ​ർ​ഡി​ന്റെ അ​ഞ്ച് ക​പ്പ​ലു​ക​ളും ര​ണ്ട് ഡോ​ണി​യ​ർ വി​മാ​ന​ങ്ങ​ളും നാ​വി​ക​സേ​ന​യു​ടെ ഡോ​ണി​യ​ർ വി​മാ​ന​വും ര​ക്ഷാ​പ്ര​വ​ർ​ത്ത​ന​ത്തി​ൽ പ​ങ്കാ​ളി​ക​ളാ​യി.

ക​ണ്ടെ​യ്ന​റു​ക​ളി​ൽ കീടനാശിനിയടക്കമുള്ള അ​പ​ക​ട​ക​ര​മാ​യ വ​സ്തു​ക്ക​ൾ ഏറെയുണ്ട്. ക്ലാ​സ് മൂ​ന്ന് (തീ​പി​ടി​ക്കു​ന്ന ദ്രാ​വ​ക​ങ്ങ​ൾ), ക്ലാ​സ് 4.1 (തീ​പി​ടി​ക്കു​ന്ന ഖ​ര​വ​സ്തു​ക്ക​ൾ), ക്ലാ​സ് 4.2 (സ്വ​യ​മേ​വ ക​ത്തു​ന്ന വ​സ്തു​ക്ക​ൾ), ക്ലാ​സ് 4.6 (വി​ഷ​വ​സ്തു​ക്ക​ൾ) എ​ന്നി​വ​യു​ൾ​പ്പെ​ടെ​യാ​ണു​ള്ള​ത്. ആ​സി​ഡു​ക​ളും ലി​ഥി​യം ബാ​റ്റ​റി​ക​ളു​മ​ട​ക്ക​മു​ള്ള​വയുമുണ്ട്.

കൊളം​ബോ​യി​ൽ നി​ന്ന് ഈ ​മാ​സം ആ​റി​നാ​ണ് ന​വി മും​ബൈ​യി​ലെ തു​റ​മു​ഖ​ത്തേ​ക്ക് എം.​വി. വാ​ൻ​ഹാ​യ് 503 പു​റ​പ്പെ​ട്ട​ത്. ചൊവ്വാഴ്ച തീ​ര​മ​ണ​യാ​നാ​യി​രു​ന്നു ല​ക്ഷ്യ​മി​ട്ടി​രു​ന്ന​ത്. ബി.​എ​സ്.​എം എ​ന്ന ക​മ്പ​നി​ക്കാ​ണ് ക​പ്പ​ലി​ന്റെ ന​ട​ത്തി​പ്പ് ചു​മ​ത​ല. കൊച്ചിക്കും കോഴിക്കോടിനുമിടയിലുള്ള തീരങ്ങളിൽ കണ്ടെയ്നറുകൾ വന്നടിയാൻ സാധ്യതയുള്ളതിനാൽ ജാഗ്രത പുലർത്തണമെന്ന് നിർദേശമുണ്ട്.

മെ​യ് 25 കേ​ര​ള​തീ​ര​ത്തു​നി​ന്ന് 14.6 നോ​ട്ടി​ക്ക​ൽ മൈ​ൽ അ​ക​ലെ അ​റ​ബി​ക്ക​ട​ലി​ൽ എം.​എ.​സ്‍സി എ​ല്‍സ 3 എ​ന്ന ലൈ​ബീ​രി​യ​ൻ ച​ര​ക്കു​ക​പ്പ​ൽ അ​പ​ക​ട​ത്തി​ൽ​പ്പെ​ട്ട് ക​ണ്ടെ​യ്ന​റു​ക​ൾ ക​ട​ലി​ൽ ഒ​ഴു​കി​യി​രു​ന്നു.