സാമ്പത്തിക പ്രതിസന്ധി: കുഞ്ഞാലിക്കുട്ടിയുടെ​ നിലപാട്​ സ്വാഗതം ചെയ്ത്​ മുഖ്യമന്ത്രി

ആലപ്പുഴ: സംസ്ഥാന സർക്കാർ നേരിടുന്ന സാമ്പത്തിക പ്രശ്നത്തിൽ സംസ്ഥാന സർക്കാറിനൊപ്പം നിൽക്കുമെന്ന മുസ്​ലിം ലീഗ് നേതാവ് പി.കെ. കുഞ്ഞാലിക്കുട്ടിയുടെ​ നിലപാട്​ സ്വാഗതം ചെയ്ത്​ മുഖ്യമന്ത്രി പിണറായി വിജയൻ. ലീഗിന്‍റേത്​ സ്വാഗതാർഹമായ നിലപാടാണെന്ന്​ മുഖ്യമന്ത്രി ആലപ്പുഴയിൽ പറഞ്ഞു.

ഇപ്പോഴത്തെ സാമ്പത്തിക പ്രതിസന്ധിയിൽ കേന്ദ്രത്തിനെതിരെ കേരളത്തിലെ എല്ലാ കക്ഷികളും ഒരുമിച്ച്​ നിൽക്കണമെന്നും ഇക്കാര്യത്തിൽ സംസ്ഥാന സർക്കാറിനൊപ്പം ലീഗ്​ ഉണ്ടാകുമെന്നുമുള്ള കുഞ്ഞാലിക്കുട്ടിയുടെ അഭിപ്രായം മാധ്യമ പ്രവർത്തകർ ശ്രദ്ധയിൽപെടുത്തിയപ്പോൾ പ്രതികരിക്കുകയായിരുന്നു മഖ്യമന്ത്രി. ഇത്​ പറയുമ്പോൾ ഉടനെ ലീഗ്​ ഇങ്ങ്​ വന്ന്​കളയും എന്ന്​ ആരും ധരിക്കേണ്ട. ലീഗിനെ ഇങ്ങ്​ കൊണ്ടുവരാൻ വേണ്ടി ഞങ്ങൾ വല്ലാതെ പാടുപെടുകയാണ്​ എന്ന വ്യാഖ്യാനവും വേണ്ട എന്നും മുഖ്യമന്ത്രി പറഞ്ഞു.

ഈ നാടിന്‍റെ പ്രശ്നങ്ങൾ മനസിലാക്കുന്നവർക്കെല്ലാം ലീഗ്​ എടുത്ത നിലപാടിന്​ സമാനമായ രീതിയിൽ മാത്രമെ പ്രതികരിക്കാനാവൂ. ഞങ്ങൾ ഇത്​ പ്രതിപക്ഷത്തോട്​ പൊതുവേ അഭ്യർഥിച്ചു കൊണ്ടിരിക്കുകയാണ്​. നമ്മുടെ നാട്​ നേരിടുന്ന പ്രശ്നങ്ങളാണ്​ ഏറ്റവും ഗുരുതരമായിട്ടുള്ളത്​. അതിന്‍റെ ഭാഗമായി നാടിന്‍റെ കൈയിൽ കിട്ടേണ്ട പണമാണ്​ നഷ്ടമാകുന്നത്​.

ഇത്​ പെട്ടെന്ന്​ ഏതെങ്കിലും പദ്ധതിയെ ബാധിക്കുന്നതോ, ഒരു വർഷത്തെ പദ്ധതിയെ ബാധിക്കുന്നതോ അല്ല. കേരളത്തിന്‍റെ ഭാവി വികസനത്തെ തടയുന്നതിനാണ്​ ഇത്​ വഴിയൊരുക്കുക. അത്തരം ഒരുഘട്ടത്തിൽ നമ്മൾ എല്ലാവരും ഒരുമിച്ച്​ നിൽക്കണം. അതിൽ ഭരണപക്ഷ പ്രതിപക്ഷ വ്യത്യാസം ഇല്ലാതെ തന്നെ കേരളത്തിൽ ഒറ്റക്കെട്ടായി നിൽക്കാൻ കഴിയണം. പക്ഷേ, കോൺഗ്രസ്​ സംസ്ഥാന സർക്കാറിനെ വിമർശിക്കുകയാണെന്നും മുഖ്യമന്ത്രി പറഞ്ഞു.