മദ്യപാനത്തിനിടെ വാക്കുതർക്കം; സുഹൃത്തിനെ കമ്പിപ്പാര കൊണ്ട് തലക്കടിച്ചുകൊന്നു VIDEO

ബാലരാമപുരം: മദ്യലഹരിയിൽ സുഹൃത്തുക്കൾ തമ്മിലുണ്ടായ കൈയാങ്കളിയിൽ തലക്കടിയേറ്റ് യുവാവ് മരിച്ചു. കരമന സ്വദേശിയും ഓട്ടോ ഡ്രൈവറുമായ ശ്യാം ആണ് മരിച്ചത്. സംഭവവുമായി ബന്ധപ്പെട്ട് ഒളിവിൽ പോയ മുക്കോല സ്വദേശി സതിക്കുവേണ്ടി ബാലരാമപുരം പൊലീസ് അന്വേഷണം ആരംഭിച്ചു. 

സംഭവത്തെ കുറിച്ച്​ പൊലീസ്​ പറയുന്നത്​ ഇങ്ങനെ: ഓട്ടോറിക്ഷ തൊഴിലാളികളായ ഇരുവരും കട്ടച്ചൽ കുഴിയിൽ വാടകക്ക്​ താമസിക്കുകയായിരുന്നു. കഴിഞ്ഞ ദിവസം രാത്രി മദ്യപിക്കുന്നതിനിടെ ഇവർ തമ്മിൽ വാക്കുതർക്കത്തിലേർപ്പെട്ടു. ഇത്​ കൈയാങ്കളിയിലേക്കെത്തുകയും​ സതി ശ്യാമിൻെറ തലക്ക്​ കമ്പിപ്പാര കൊണ്ട് അടിക്കുകയുമായിരുന്നു.

ഗുരുതരമായി പരിക്കേറ്റ ശ്യാമിനെ മെഡിക്കൽ കോളജ്​ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ശ്യാം അവിവാഹിതനാണ്. കൃത്യത്തിനു ശേഷം ഒളിവിൽ പോയ  സതിക്കു വേണ്ടിയുള്ള അന്വേഷണം ഊർജ്ജിതമാക്കിയതായി നെയ്യാറ്റിൻകര ഡിവൈ.എസ്.പി അനിൽകുമാറും സി.ഐ ബിനുവും അറിയിച്ചു. മൃതദേഹം തിരുവനന്തപുരം മെഡിക്കൽ കോളജ് മോർച്ചറിയിൽ സൂക്ഷിച്ചിരിക്കുകയാണ്​.