ഫസൽ വധക്കേസ്​: ഹൈകോടതി വിധി വൈകിയെത്തിയ നീതിയെന്ന്​ പി.ജയരാജൻ

കണ്ണൂർ: ഫസൽ വധക്കേസിലെ ഹൈകോടതി വിധി വൈകിയെത്തിയ നീതിയാണെന്ന്​ സി.പി.എം നേതാവ്​ പി.ജയരാജൻ. ഒമ്പത്​ വർഷമായി സി.പി.എം നേതാക്കളായ കാരായി രാജനേയും കാരായി ചന്ദ്രശേഖരനേയും കേസിന്‍റെ പേരിൽ വേട്ടയാടുകയാണ്​. ജാമ്യം ലഭിച്ചതിന്​ ശേഷം ഇരുവരും എറണാകുളത്ത്​ കഴിയുകയാണ്​. ജാമ്യവ്യവസ്ഥ പ്രകാരം സ്വന്തം വീട്ടിലേക്ക്​ പോകാൻ പോലും കഴിയാത്ത സാഹചര്യത്തിലാണ്​ ഇരുവരുമുള്ളതെന്നും അദ്ദേഹം പറഞ്ഞു.

വൈകിയെത്തിയ നീതി, നീതി നിഷേധമായാണ്​ വിലയിരുത്തുക. അങ്ങനെയാണെങ്കിലും ഹൈകോടതി വിധിയെ സ്വാഗതം ചെയ്യുകയാണ്​. കേസിൽ ആർ.എസ്​.എസും പോപ്പുലർ ഫ്രണ്ടും സി.പി.എമ്മിനെ പ്രതിക്കൂട്ടിൽ നിർത്താനുള്ള നീക്കങ്ങളാണ്​ നടത്തിയത്​. കൊലപാതകം നടന്ന സമയത്ത്​ ആർ.എസ്​.എസ്​ ആയിരുന്നു ഇതിന്​ പിന്നിലെന്നാണ്​ എൻ.ഡി.എഫ്​ നേതാക്കളും പറഞ്ഞിരുന്നത്​. പിന്നീട്​ ഈ നിലപാട്​ അവർ മാറ്റുകയായിരുന്നുവെന്നും പി.ജയരാജൻ പറഞ്ഞു.

വിധിയിൽ സന്തോഷം പ്രകടിപ്പിച്ച്​ കേസിലെ പ്രതി കാരായി രാജനും രംഗത്തെത്തി. അതേസമയം, കൊലപാതകത്തിന്​ പിന്നിൽ സി.പി.എമ്മാണെന്ന നിലപാട്​ ഫസലിന്‍റെ ഭാര്യ ആവർത്തിച്ചു.