'ഹരിത'ക്ക്​ നീതി ലഭിച്ചില്ല -അഡ്വ. ഫാത്തിമ തഹ്​ലിയ

കോഴിക്കോട്​: എം.എസ്​.എഫ്​ ഭാരവാഹികൾക്കെതിരായ പരാതിയിൽ 'ഹരിത'ക്ക്​ മുസ്​ലിം ലീഗിൽനിന്ന്​ നീതി ലഭിച്ചില്ലെന്ന്​ എം.എസ്​.എഫ്​ ദേശീയ വൈസ്​ പ്രസിഡൻറ്​ അഡ്വ. ഫാത്തിമ തഹ്​ലിയ. വനിത കമീഷനിൽ പരാതി നൽകിയവരെ ചേർത്തുപിടിക്കുമെന്നും പെൺകുട്ടികളെ മക്കളും സഹോദരങ്ങളുമായി കാണുന്നവരുടെ​െയല്ലാം പിന്തുണ അവർ അർഹിക്കു​ന്നുണ്ടെന്നും ഫാത്തിമ വാർത്തസമ്മേളനത്തിൽ പറഞ്ഞു. ലൈംഗികാധിക്ഷേപം നടത്തിയവർക്കെതിരെ നടപടിയെടുക്കുന്നതിന്​ മുമ്പ്​ അവരോട്​ വിശദീകരണം ചോദിക്കൽ സ്വാഭാവിക നീതിയാണ്​. എന്നാൽ, ആ നീതി ഹരിത കമ്മിറ്റിക്കെതിരെ നടപടിയെടുത്തപ്പോൾ പാലിക്കപ്പെടാത്തതിൽ ദുഃഖവും പ്രതിഷേധവു​മുണ്ടെന്നും അവർ കൂട്ടിച്ചേർത്തു.

ഹരിത മുസ്​ലിം ലീഗിന്​ നേ​ട്ടമേ ഉണ്ടാക്കിയിട്ടുള്ളൂ. ഹരിത ഭാരവാഹികൾ ഇതുവരെ പൊതുജന മധ്യത്തിൽ ഒരുകാര്യവും പറഞ്ഞിട്ടില്ല. പാർട്ടി വേദികളിലും നേതാക്കളോടും പരാതിപ്പെട്ടിട്ട്​ പരിഹാരം വൈകിയതിനാലാണ്​ അവർ വനിത കമീഷനെ സമീപിച്ചത്​. ഇത്​ അച്ചടക്ക ലംഘനമല്ല. കുറ്റകൃത്യം നടന്നാൽ നിയമ നടപടി സ്വീകരിക്കൽ മൗലികാവകാശമാണ്​. സോഷ്യൽ മീഡിയയിലൂടെയും മറ്റും അപമാനിച്ചതിനെതിരെ താനും മുമ്പ്​ നിയമനടപടി സ്വീകരിച്ചിട്ടുണ്ട്​. ലീഗിലെ മുഴുവൻ നേതാക്കൾക്കും രേഖാമൂലവും അല്ലാതെയും വീട്ടിലും ഓഫിസിലുമെത്തി പരാതി പറഞ്ഞിട്ടും നടപടി താമസിപ്പിച്ചത്​ മാനഹാനി സംഭവിച്ചവർക്ക്​ വേദനയുണ്ടാക്കിയിട്ടുണ്ട്​. സഹിക്കാവുന്നതിനപ്പുറവും സഹിക്കേണ്ടി വന്നതിനാലാണ്​ വനിത കമീഷനെ സമീപിച്ചതെന്നും ഫാത്തിമ വിശദീകരിച്ചു.

പ്രശ്​നത്തി​‍െൻറ പേരിൽ ഹരിത ഭാരവാഹികളെയും പ്രവർത്തകരെയും സമൂഹ മാധ്യമങ്ങളിലും മറ്റും അപമാനിക്കുന്നതും വ്യക്​തിഹത്യ നടത്തുന്നതും നിർത്തണം. പാർട്ടിയിൽ തങ്ങൾക്ക്​ വിശ്വാസമുണ്ട്​. കുറ്റം ആരോപിക്കപ്പെട്ടവർക്കെതിരെ നടപടിയെടുക്കുമെന്ന്​ പ്രതീക്ഷിക്കുന്നു. പാർട്ടിയിൽ നേതാക്കൾതന്നെയാണ്​ വലുത്​. എന്നാൽ, പ്രവർത്തകരെ ചെറുതായി കാണുന്ന രീതിയിൽ പെരുമാറരുത്​​. നിരവധി നേതാക്കൾ പെൺകുട്ടികൾക്ക്​ പിന്തുണ അറിയിച്ചിട്ടുണ്ട്​. വിഷയത്തിൽ സി.എച്ചി​‍െൻറയും സീതി സാഹിബി​‍െൻറയും മാതൃക പിൻപറ്റി രാജ്യത്തെ മുഴുവൻ രാഷ്​ട്രീയ പാർട്ടികൾക്കും മാതൃകയാവാൻ മുസ്​ലിം ലീഗിന്​ സാധിക്കേണ്ടതുണ്ടെന്നും ഫാത്തിമ പറഞ്ഞു.