ഫാസ്​ടാഗ്​: ഗതാഗതക്കുരുക്ക്​; എ.ഐ.വൈ.എഫ്​ ടോൾ ഗേറ്റ്​ തുറന്നുവിട്ടു

തൃശൂർ: തിങ്കളാഴ്​ച അർധരാത്രി മുതൽ ഫാസ്​ടാഗ്​ നിർബന്ധമാക്കിയതിനെ തുടർന്ന്​ പാലിയേക്കര ടോൾ പ്ലാസയിൽ വൻ വാഹനക്കുരുക്ക്​. പണമടച്ച്​ ടോൾ ബൂത്ത്​ കടക്കാനുള്ള അവസരം ഇല്ലാതായതോടെ ഫാസ്​ടാഗില്ലാത്ത വാഹനങ്ങൾ ടോളിൽ കുടുങ്ങിയതാണ്​ കുരുക്കിന്​ ഇടയാക്കിയത്​.

ഇന്ന്​ പുലർച്ചെ മുതൽ ടോൾ പ്ലാസയുടെ രണ്ട്​ ഭാഗത്തായി കിലോമീറ്റർ നീണ്ട വാഹന നിര രൂപപ്പെട്ടു. വാഹന യാത്രക്കാരും ടോൾ പ്ലാസ ജീവനക്കാർ തമ്മിൽ വഴക്കും സംഘർഷവുമുണ്ടായി.

ഇതിനെതിരെ ടോൾ പ്ലാസയിൽ എത്തിയ എ.ഐ.വൈ.എഫ്​ പ്രവർത്തകർ ബലമായി ടോൾ ഗേറ്റ്​ തുറന്ന്​ വാഹനങ്ങൾ കടത്തിവിട്ടു. കൂടുതൽ പ്രതിഷേധക്കാർ ടോൾ പ്ലാസയിലേക്ക്​ എത്തുകയാണ്​. പൊലീസും എത്തിയിട്ടുണ്ട്​.